మూడోస్సారి: కిమ్ చైనా పర్యటన వెనక అజెండా ఏంటి..?
చైనా: సింగపూర్లో అమెరికా అధ్యక్షుడు డొనాల్డ్ ట్రంప్తో భేటీ అయిన కొద్ది రోజులకే ఉత్తర కొరియా అధ్యక్షుడు కిమ్ జాంగ్ ఉన్ చైనా అధ్యక్షుడు జిన్పింగ్ను కలిసేందుకు చైనా రావడం ప్రపంచవ్యాప్తంగా చర్చనీయాంశంగా మారింది. రెండు రోజుల పాటు ఆయన చైనాలో పర్యటించనున్నారు. ఈ ఏడాది మార్చి నెల నుంచి కిమ్.. జిన్పింగ్తో సమావేశమవడం ఇది మూడో సారి.
అమెరికా చైనా దేశాల మధ్య వాణిజ్య యుద్ధం ముదురుతున్న నేపథ్యంలో కిమ్ చైనా పర్యటన ప్రాధాన్యత సంతరించుకుంది. అమెరికా చైనా దేశాల మధ్య వాణిజ్య యుద్ధం జరుగుతున్నందునే కిమ్ చైనాకు వెళ్లారని బీజింగ్లోని రెన్మిన్ యూనివర్శిటీలో పనిచేస్తున్న కొరియా నిపుణులు ఒకరు తెలిపారు. అయితే సింగపూర్ సమావేశం తర్వాత కిమ్ చైనాతో రాయబారం నడుపుతున్నారా అన్న అనుమానాలు సైతం వ్యక్తం అవుతున్నాయి.
మార్చిలో తన తొలి చైనా పర్యటన సందర్భంగా కిమ్ జాంగ్ ఉన్ రైళ్లో బీజింగ్కు చేరుకున్నారు. ఆ తర్వాత మేలో రెండో సారి చైనా పర్యటనలో తీర ప్రాంత నగరమైన దాలియన్ను సందర్శించి అక్కడ ఇరుదేశాధ్యక్షులు పలు అంశాలపై చర్చించారు.