అమెరికాలో భారీ భూకంపం: 7.8 తీవ్రత.. అలస్కా తీరంలో సునామీ హెచ్చరికలు జారీ.. హైటెన్షన్..
అగ్రరాజ్యం అమెరికాలో బుధవారం ఉదయం భారీ భూకంపం సంభవించింది. అలస్కా దక్షిణ తీరంలోని చిగ్నిక్ సిటీకి 98 కిలోమీటర్ల దూరంలో భూకంప కేంద్రాన్ని గుర్తించారు. సముద్ర అడుగున 10 కిలోమీటర్ల లోతులో ఈ భూకంపం సంభవించడంతో సునామీ తలెత్తనుంది. స్థానిక కాలమానం ప్రకారం ఉదయం 6.12 కు భూకంపం సంభవించగా, మరో గంటన్నరలో సునామీ తీరాన్ని తాకనున్నట్లు అధికారులు తెలిపారు. ఈ మేరకు అమెరికా జియాలజికల్ సర్వే(యూఎస్జీఎస్) కీలక ప్రకటన విడుదల చేసింది. అలస్కా తీరం నుంచి 300 కిలోమీటర్ల మేర సునామీ ప్రభావం ఉంటుందని ప్రజల్ని అప్రమత్తం చేశారు.
నేషనల్ ఓషియానిక్ అండ్ అట్మాస్ఫియరిక్ అడ్మినిస్ట్రేషన్ వివరణ ప్రకారం భూకంపం తరువాత సంభవించబోయే సునామీ దక్షిణ అలస్కాను ప్రభావితం చేస్తుందని, పసిఫిక్ తీరంలోని కెన్నడీ ఎంట్రెన్స్ నుంచి హోమర్కు నైరుతి దిశలో 40 మైళ్ళ వరకు ఎఫెక్ట్ ఉండనుంది. భూకంప తీవ్రత 7.6 నుంచి 7.8 మధ్యలో ఉంటే అవి విధ్వసక సునామీలను సృష్టిస్తాయని యుఎస్జీఎస్ పేర్కొంది. మరిన్ని భూకంపాలు రావొచ్చని ఆ సంస్థ హెచ్చరించిన కొద్ది సేపటికే..
Recommended Video
అదే అలస్కా తీరంలో శాండ్ పాయింట్ తీరం నుంచి 103 కిలోమీటర్ల దూరంలో మరో భారీ భూకంపం సంభవించింది. పసిఫిక్ సముద్రంలో 17.7 కిలోమీటర్ల లోతులో తలెత్తిన ఈ భూకంపం తీవ్రత రిక్టర్ స్కేలుపై 6.1గా నమోదైంది. సముద్రం అడుగులో భూకంపం వల్ల తీర పట్టణాల్లో ఎలాంటి ప్రభావం పడలేదని యూఎస్ జీఎస్ తెలిపింది.