నీట మునుగుతున్నాడనుకొని.. రక్షించేందుకు ఏనుగు పరుగులు
న్యూఢిల్లీ: తన హ్యూమన్ స్నేహితుడిని రక్షించేందుకు ఓ ఏనుగు హడావుడిగా పరుగెత్తుకు వచ్చిన ఓ వీడియో ఇప్పుడు ఇంటర్నెట్లో వైరల్ అవుతోంది. అతను నీటిలో మునిగిపోతున్నాడని భావించి పరుగువ వచ్చిన ఏనుగు అతనిని పైకి లాగింది. ఇప్పుడు ఈ వీడియోను 2.2 మిలియన్ మంది చూశారు.
ఆ ఏనుగు కూడా గున్న ఏనుగు. అది తన శిక్షకుడు నీటిలో మునిగిపోతున్నాడని పరుగు పరుగున నీటిలోకి వెళ్లి కాపాడింది. తన స్నేహితుడు ఆపదలో ఉన్నాడేమో కాపాడాలని ఆత్రుతగా వెళ్తున్న ఏనుగు పిల్లకు చెందిన వీడియోను చూసిన వారంతా ముచ్చట పడుతున్నారు.
ఈ ఘటన థాయ్లాండ్లోని ఎలిఫెంట్ నేచర్ పార్క్లో జరిగింది. పార్క్లోని ఏనుగుల శిక్షకుడు డేర్రిక్ నిజానికి నీటిలో మునిగిపోవట్లేదు. అతడు నీటిలో ఈత కొడుతున్నాడు. అయితే ఖామ్ లా అనే గున్న ఏనుగు మాత్రం తన మిత్రుడు ప్రమాదంలో ఉన్నాడని భావించింది. నీళ్లలో గబ గబా నడుచుకుంటూ డేర్రిక్ దగ్గరికి వెళ్లి.. తొండంతో, కాళ్లతో అతడిని పట్టుకుంది. ఈ వీడియో అక్టోబర్ 12వ తేదీన షేర్ చేశారు.