లెబనాన్లో భారీ పేలుడు: ఆకాశాన్ని తాకిన పొగలు, మిస్టరీ వీడని ఘటన
లెబనాన్: హెజ్బోల్లా ప్రభావం బలంగా ఉన్న దక్షిణ లెబనాన్లో మంగళవారం భారీ పేలుడు సంభవించింది. దీంతో ఓ గ్రామం మొత్తం పొగలు కమ్ముకున్నాయి. ఈ పేలుడుకు కారణాలు మాత్రం తెలియరాలేదు.
ఎయిన్ ఖానా అనే దక్షిణాది గ్రామంలో ఈ పేలుడు సంభవించింది. సిడాన్ పోర్టు సిటీకి ఇది దగ్గరలో ఉంటుంది. ఈ పేలుడు కారణంగా ప్రాణ, ఆస్తి నష్టం ఏదైనా జరిగిందా? అనేది ఇంకా తెలియరాలేదు.
ఈ ప్రాంతంలో పేలుడు జరిగిందని అంగీకరించిన షీటే మిలిటెంట్ గ్రూప్ హెజ్బోల్లా.. పేలుడుకు సంబంధించిన విషయాలేవీ చెప్పలేదు. ఈ ఘటనలో ఎంత మంది చనిపోయారనే విషయం కూడా తెలియదని మరో స్థానిక హెజ్బోల్లా అధికారి చెప్పారు. పేలుడుకు సంబంధించిన వివరాలు వెల్లడించేందుకు తమకు ఎలాంటి అధికారం లేదని చెప్పారు.
కాగా, మీడియాను ఘటనా స్థలానికి చేరుకోకుండా ఈ గ్రూపు సభ్యులు అడ్డుకోవడం గమనార్హం. అయితే, దూరాన్ని కొంత మంది ఈ పేలుడుకు సంబందించిన వీడియోలను తీశారు. ఓ భవనం కుప్పకూలిందని స్థానిక అల్ జదీద్ స్టేషన్ ప్రసారం చేసింది.
A huge explosion in southern Lebanon between Jabaa and Ain Qana in the Iqlim al-Tuffah pic.twitter.com/wOFNIX9tt6
— INTELSky (@Intel_Sky) September 22, 2020
లెబనాన్ రాజధాని నగరంలో బీరూట్లో ఇటీవల భారీ పేలుడు సంభవించిన విషయం తెలిసిందే. బీరూట్ పోర్టులో సుమారు 3వేల టన్నుల అమ్మోనియం నైట్రేట్ పేలుడు పదార్థాలను ఉంచడమే ఈ ప్రమాదానికి కారణం. కాగా, ఈ పేలుళ్ల కారణంగా భారీ ఎత్తున ఆస్తి నష్టం జరగింది.
సుమారు 200 మందికిపైగా ప్రాణాలు కోల్పోగా, 6500 మంది గాయాలపాలయ్యారు. ఆ ప్రాంతం పూర్తిగా కోలుకోవడానికి కనీసం ఏడాది కాలం పడుతుందని స్థానికులు అభిప్రాయపడుతున్నారు. తాజాగా మరో పేలుడు సంభవించడంతో అసలు అక్కడ ఏం జరిగిందనేది తెలియాల్సి ఉంది.