గాల్లో విమానం తలుపు తెరవబోయింది
లండన్: గాలిలో వందల కిలోమీటర్ల ఎత్తులో వేల కిలోమీట్ల వేగంతో వెళుతున్న విమానం తలుపు తెరవడానికి ఓ మహిళా ప్రయాణికురాలు విఫలయత్నం చేసింది. అయితే సాటి ప్రయాణికులు విషయం గుర్తించి సిబ్బందికి సమాచారం ఇవ్వడంతో పెద్ద ప్రమాదం తప్పింది.
బ్రిటీష్ ఎయిర్ వేస్ కు చెందిన ఓ విమానం లండన్ నుంచి అమెరికాలోని బోస్టన్ నగరానికి బయలుదేరింది. అదే విమానంలో పోలాండ్ దేశానికి చెందిన కమీలా డోల్ నియాక్ (32) అనే మహిళ ప్రయాణించింది.
మార్గం మధ్యలో ఒక్క సారిగా తన సీటులో నుంచి లేచిన కమీలా నేరుగా విమానం తలుపు దగ్గరకు వెళ్లింది. తరువాత తలుపు తియ్యడానికి విఫలయత్నం చేసింది. విషయం గుర్తించిన సాటి ప్రయాణికులు విమానంలోని సిబ్బందికి సమాచారం ఇచ్చారు.
ప్రయాణికులు, సిబ్బంది కలిసి ఆమెను పట్టుకున్నారు. బోస్టన్ లో విమానం ల్యాండ్ అయ్యాక సిబ్బంది కమీలాను ఎయిర్ పోర్టు అధికారులకు అప్పగించారు. తరువాత కమీలాకు అపరాధ రుసుం విధించిన అధికారులు బోస్టన్ న్యాయస్థానం ముందు హాజరుపరిచారు.
ఆమెకు మతిస్థిమితం లేకుండా ఇలా చేసిందా, ఇంకేమైనా కారణాలు ఉన్నాయా అని ఆరా తీస్తున్నామని అధికారులు తెలిపారు. కమీలాకు ఉగ్రవాదులతో సంబంధాలు లేవని అధికారుల ప్రాథమిక దర్యాప్తులో వెలుగు చూసింది. అయితే అధికారులు పలుకోణాలలో దర్యాప్తు చేస్తున్నారు.