అమెరికాలో కారు బీభత్సం... నిరసనకారుల పైకి దూసుకెళ్లి... తీవ్ర కలకలం...
అమెరికాలోని న్యూయార్క్లో ఉన్న మాన్హట్టాన్ ముర్రే హిల్ ప్రాంతంలో ఓ బీఎండబ్ల్యూ కారు నిరసనకారుల పైకి దూసుకెళ్లడం తీవ్ర కలకలం రేపింది. ఈ ప్రమాదంలో పలువురు గాయపడగా.. వారందరినీ ఆస్పత్రికి తరలించారు. ఇది ఉద్దేశపూర్వకంగా జరిగిందా... లేక ప్రమాదవశాత్తు జరిగిందా అన్నది ఇంకా తేలాల్సి ఉంది. శుక్రవారం సాయంత్రం 4.30గం. సమయంలో ఈ ప్రమాదం జరిగినట్లు తెలుస్తోంది.
సరైన డాక్యుమెంట్స్ లేవన్న ఆరోపణలతో ఇమ్మిగ్రేషన్&కస్టమ్ ఎన్ఫోర్స్మెంట్ ఏజెంట్స్ కొంతమంది ఇమ్మిగ్రెంట్స్ను అదుపులోకి తీసుకోవడాన్ని నిరసిస్తూ మాన్హట్టాన్లో స్థానికులు నిరసన ప్రదర్శన చేపట్టారు. మొదట ఇది 'బ్లాక్ లివ్స్ మ్యాటర్' ఉద్యమంగా స్థానిక మీడియా రిపోర్ట్ చేసినప్పటికీ... ఇమ్మిగ్రెంట్స్ అరెస్టులకు వ్యతిరేకంగా చేపట్టిన నిరసన అని ఆ తర్వాత తెలిసింది.
కారు బీభత్సంపై న్యూయార్క్ పోలీస్ అధికారి ఒకరు మాట్లాడుతూ.. ప్రమాదంలో ఎంతమంది గాయపడ్డారన్నది ఇంకా తెలియరాలేదన్నారు. అయితే ఎవరికీ ప్రాణాపాయం మాత్రం లేదని చెప్పారు. ఆ కారు డ్రైవర్ను అదుపులోకి తీసుకున్నట్లు చెప్పారు. ఇది ప్రమాదమా... లేక ఉద్దేశపూర్వకంగా చేసిన దాడా అన్నది ఇప్పుడే చెప్పలేమన్నారు. ప్రత్యక్ష సాక్షులు ఈ ఘటనపై మాట్లాడుతూ... కనీసం ఆరుగురు గాయపడినట్లు తెలిపారు. ప్రత్యక్ష సాక్షుల్లో ఒకరు ఇది ఉద్దేశపూర్వకంగా జరిగిన దాడే అని ఆరోపించారు.
Recommended Video
ఏబీసీ న్యూస్ రిపోర్ట్ ప్రకారం.. ప్రమాద సమయంలో అక్కడ కనీసం 40-50 మంది నిరసనకారులు ఉన్నారు.కారులో ఇద్దరు శ్వేత జాతి మహిళలు ఉన్నారు. అయితే వారి వివరాలు ఇంకా వెల్లడి కాలేదు.