పాక్లో చోటా షకీల్ కుమార్తె పెళ్లి: దుబాయ్లో రిసెప్షన్!
ముంబై: పోలీసులకు చిక్కకుండా తిరుగుతున్న అండర్ వరల్డ్ డాన్ బాబుమియా చోటా షకీల్ కుమార్తె జోయా వివాహం అమెరికాకు చెందిన వైద్యుడితో పాకిస్థాన్లో జరిగింది. ఈ వివాహం గతవారం కరాచీలోని డిఫెన్స్ ఏరియాలో ఉన్న ఓ ప్యాలెస్లో ఘనంగా జరిగినట్లు ఇంటెలిజెన్స్ వర్గాలు తెలిపాయి. దీన్ని బట్టి గమనిస్తే చోటా షకీల్కు పాకిస్థాన్ ఆశ్రయం ఇస్తోందని అర్థమవుతోంది.
సెప్టెంబర్ 22న షకీల్ కూతురు వివాహం జరిగిందని ముంబై పోలీసు వర్గాలు పేర్కొన్నాయి. త్వరలోనే దుబాయ్లో ఈ వివాహ రిసెప్షన్ జరుపనున్నట్లు తెలిసింది. ఈ నేపథ్యంలో ముంబై పోలీసులు అప్రమత్తమయ్యారు. చోటా షకీల్ కార్యకలాపాలపై నిఘా పెట్టారు. ముంబై ఎయిర్పోర్టులో నిరంతర నిఘా ఏర్పాటు చేశారు.
సెప్టెంబర్ 27న దుబాయ్లో షకీల్ కూతురు వివాహ రిసెప్షన్ జరుగుతుందనే సమాచారం రావడంతో పోలీసులు నిఘా విస్తృతం చేశారు. ఈ రిసెప్షన్ కార్యక్రమానికి ముంబై నుంచి అతని శ్రేయోభిలాషులు, సెలబ్రిటీలు వెళ్లే అవకాశం ఉందని పోలీసులు భావిస్తున్నారు.
ఈ నేపథ్యంలోనే ముంబై నుంచి దుబాయ్ వెళ్లేవారిపై దృష్టి పెట్టినట్లు ఓ సీనియర్ పోలీసు అధికారి చెప్పారు. అయితే వారు దుబాయ్కి నేరుగా కాకుండా మరికొన్ని చోట్లు తిరిగి దుబాయ్ చేరుకునే అవకాశం ఉందని ఆయన తెలిపారు. అవసరమైతే దుబాయ్లోని అధికారులను సంప్రదించనున్నట్లు చెప్పారు.