ఘోరం: బ్రేకప్ చెప్పిందని 80సార్లు కత్తితో పొడిచాడు
లండన్: తమ మధ్య ఉన్న సంబంధానికి ముగింపు పలుకుదామన్న ప్రియురాలి వ్యాఖ్యలను జీర్ణించుకోలేని ఓ ప్రియుడు సుమారు 80సార్లు కత్తితో పొడిచి ఆమెను దారుణంగా హత్య చేశాడు. ఆ దుర్మార్గుడు పాశవికంగా యువతిపై దాడి చేయడంతో చివరికి కత్తే పూర్తిగా వంగిపోయింది. ఈ దారుణ ఘటన గత జులైలో లండన్లో చోటు చేసుకుంది.
కాగా, ఈ హత్య కేసును అక్కడి న్యాయస్థానం మంగళవారం విచారించింది. లండన్కు చెందిన జోర్డన్ టైలర్(22) తన ప్రియురాలు లారా డెవియస్(21)తో కలిసి ఉండేవాడు. ఇద్దరి మధ్య ఉన్న సంబంధానికి ముగింపు పలుకుదామని ఓ రోజు లారా కోరడంతో ఆగ్రహానికి గురైన టైలర్ ఆమెపై కత్తితో దాడికి తెగబడ్డాడు.
పారిపోవడానికి ప్రయత్నించినా.. వెంబడించి చెట్ల పొదల్లోకి లాక్కెళ్లి సుమారు 80 సార్లు కత్తితో పొడిచాడని న్యాయవాదులు కోర్టుకు తెలిపారు.
తీవ్రంగా గాయపడిన లారాను ఆస్పత్రికి తరలించగా చికిత్స పొందుతూ మృతి చెందిందని చెప్పారు. హత్య చేసినందుకు విచారణ సందర్భంగా టైలర్ ఎలాంటి విచారం వ్యక్తం చేయలేదు. కాగా, చేసిన నేరానికి టైలర్కు కఠినమైన శిక్ష పడే అవకాశం ఉందని తెలిపారు.