ఎయిర్హోస్టెస్ల ఫైట్: విమానం అత్యవసర ల్యాండింగ్
న్యూయార్క్: గాలిలో ప్రయాణిస్తున్న విమానంలో ఇద్దరు ఎయిర్హోస్టెస్ల మధ్య రాజుకున్న గొడవ తీవ్రంగా మారింది. ఎంతకీ ఆ గొడవ సద్దుమణగకపోవడంతో పైలట్ విమానాన్ని అత్యవసరంగా దించివేయాల్సి వచ్చింది. ఈ ఘటన అమెరికాలో చోటు చేసుకుంది.
వివరాల్లోకి వెళితే.. అమెరికాకు చెందిన డెల్టా ఎయిర్లైన్స్కి చెందిన బోయింగ్ 757-200 విమానం లాస్ఏంజెల్స్ నుంచి మిన్నియాపొలిస్కి వెళ్లాల్సి ఉంది. విమానం బయలుదేరిన కొద్ది నిమిషాలకే ఇద్దరు ఎయిర్హోస్టెస్లు పని ఒత్తిడి ఎక్కువగా ఉందంటూ వాదులాటకు దిగారు. వారికి సర్దిచెప్ప ప్రయత్నించిన మూడో ఎయిర్హోస్టెస్ని ఏకంగా చెంప పగలగొట్టారు.
విషయం తెలుసుకున్న పైలట్ ఎయిర్ ట్రాఫిక్ అధికారుల అనుమతితో విమానాన్ని ఉటాలోని సాల్ట్లేక్ సిటీలో దించేశాడు. కాగా, క్రమశిక్షణారహితంగా ప్రవర్తించిన ముగ్గురు సిబ్బందిని విధుల్లోంచి తొలగించేశారు.
అధికారులు ప్రత్యామ్నాయ సిబ్బందిని ఏర్పాటుచేయగా విమానం తిరిగి మిన్నియాపొలిస్కి చేరుకుంది. ఈ నేపథ్యంలో జరిగిన ఆలస్యానికి గాను విమానంలోని 300 మంది ప్రయాణికులను క్షమాపణలు కోరుతూ డెల్టా ఎయిర్లైన్స్ యాజమాన్యం లేఖ పంపింది.