ఎలన్ మస్క్ జలాంతర్గాములు పనిచేయవు.. తీవ్ర విమర్శలు చేసిన బ్రటిష్ డైవర్
థాయ్ల్యాండ్ గుహల్లో కొంతమంది చిన్నారులు చిక్కుకున్న రెండువారాల తర్వాత సురక్షితంగా బయటకొచ్చిన సంగతి తెలిసిందే. అయితే చిన్నారులు బయటకు తీసుకురావడం వెనక చాలామంది కృషి చేశారు. ఈ క్రమంలోనే ప్రముఖ బిజినెస్ మ్యాన్ ఎలన్ మస్క్ కూడా తమ సంస్థ తయారు చేసిన మినీ సబ్మెరైన్ను థాయ్ గుహల వద్ద వదిలి వచ్చినట్లు ట్వీట్ చేశాడు. దీనిపై మరో బ్రిటీష్ నిపుణుడు వెర్నన్ అన్స్వర్త్ నిప్పులు చెరిగారు.
ఎలన్ మస్క్ తయారు చేసిన మినీ జలాంతర్గామి ఎందుకూ పనికిరాదని తేల్చేశారు. అంతేకాదు మస్క్ మినీ సబ్మెరైన్ 5 నుంచి 6 అడుగుల వరకు మాత్రమే ఉందని అది ఈ గుహలను చేధించుకుని వెళ్లలేదని వివరించాడు. తను ఈ గుహలపై సుదీర్ఘకాలంగా పరిశోధనలు చేసినట్లు వెర్నన్ అన్స్వర్త్ తెలిపారు. అన్స్ వర్త్ చేసిన విమర్శలపై ఎలన్ మస్క్ స్పందించారు.
తమ సంస్థ తయారు చేసిన ఈ సబ్ మెరైన్ పనిచేస్తుంది అంటూ వాదించడమే కాదు... అది ఆ గుహల్లోనే పనిచేసే తీరును కూడా చూపిస్తానంటూ మస్క్ సవాల్ విసిరారు. అంతేకాదు పిల్లల ప్రాణాలు కాపాడాడని చెప్పుకుంటున్న ఈ బ్రిటీషు పెద్ద మనిషిని సహాయకచర్యలు జరిగే ప్రాంతంలో ఎక్కడా చూడలేదని మస్క్ మరో ట్వీట్ చేశారు. మస్క్ బృందం థాయ్ కేవ్స్ వద్దకు వెళ్లిన సమయంలో థాయ్ డైవర్స్, మిగతా అధికారులు తమ వెంటే ఉన్నారని గుర్తు చేశారు.
తాము గుహల దగ్గరికి వెళ్లే సరికి నీటి లెవెల్ కూడా బాగా తగ్గిపోయిందని... ఇంకా ఉధృతంగా పారి పొర్లలేదని మస్క్ చెప్పారు. అంటే ఈత కొడుతూనే ఐదవ గుహ లోపలికి వెళ్లే అవకాశముందని చెప్పారు. తాను నిజంగానే పిల్లలను కాపాడాననిన చెబుతున్న అన్స్వర్త్ ఆ చివరి వీడియోను విడుదల చేయాలని సవాల్ విసిరారు. అదేసమయంలో పిల్లలను కాపాడి బయటకు తీసుకొచ్చిన ఇతర డైవర్లను ఎలన్ మస్క్ అభినందించారు.