అమెరికాలో హిల్లరీ క్లింటన్ నగ్న విగ్రహం
న్యూయార్క్: అమెరికా అధ్యక్ష ఎన్నికలు కొత్త పుంతలు తొక్కుతున్నాయి. ఎన్నికల బరిలో ఉన్న డెమొక్రటిక్ పార్టీ అభ్యర్థి హిల్లరీ క్లింటన్ నగ్న విగ్రహం ఒకటి మాన్హట్టన్లో సంచలనం రేపింది.
వాల్స్ట్రీట్కు సమీపంలో గల మాన్హట్టన్ సబ్వే స్టేషన్ వద్ద అసభ్యకరంగా ఉన్న ఈ విగ్రహాన్ని రాత్రికి రాత్రే ఏర్పాటు చేశారు. బ్లోయింగ్ గ్రీన్ సబ్వేపై మంగళవారం ఉదయం ఇది దర్శనమిచ్చింది. హిల్లరీ టాప్లెస్ విగ్రహాన్ని చూసిన ఓ మహిళ ఆగ్రహంతో దానిని కిందపడేసింది.
దీంతో ఆ విగ్రహాన్ని తయారుచేసినట్టు చెబుతున్న ఆంథోనీ సియోలి, మహిళ నాన్సీ మధ్య వాగ్వాదం జరిగింది. ఓ దశలో విగ్రహాన్ని తిరిగి నిలబెట్టేందుకు సియోలీ ప్రయత్నించగా మహిళ అడ్డుకుని విగ్రహంపై కూర్చుండిపోయింది.
సమాచారం అందుకున్న పోలీసులు ఘటనా స్థలానికి చేరుకుని విగ్రహాన్ని ఇక్కడ ఏర్పాటు చేసేందుకు అనుమతి లేదని, దానిని తీసుకెళ్లిపోవాలని సియోలికి సూచించారు. కాగా ఆగస్టులో హిల్లరీ ప్రత్యర్థి డొనాల్డ్ ట్రంప్ నగ్న విగ్రహాన్ని కూడా అమెరికా వ్యాప్తంగా ఏర్పాటు చేసిన విషయం తెలిసిందే.