నమో థాలీస్: భారత ప్రధాని కోసం హూస్టన్ చెఫ్ ప్రత్యేక మెనూ!
హూస్టన్: అమెరికాలో ప్రతిష్టాత్మకంగా జరగనున్న 'హౌడీ మోడీ' కార్యక్రమంలో పాల్గొనేందుకు భారత ప్రధాని నరేంద్ర మోడీ అక్కడికి చేరుకున్నారు. ఐక్యరాజ్యసమితి సాధారణ అసెంబ్లీలో జరిగే ఓ ప్రత్యే సదస్సులో కూడా మోడీ పాల్గొని ప్రసంగించనున్నారు.
ఆదివారం హూస్టన్లోని ఎన్ఆర్జీ స్టేడియంలో అత్యంత ఘనంగా హౌడీ మోడీ కార్యక్రమం జరపనున్నారు. కాగా, ప్రధాని నరేంద్ర మోడీ మీద ఉన్న అభిమానంతో హూస్టన్లోని ప్రముఖ చెఫ్, ప్రవాస భారతీయురాలైన కిరణ్ వర్మ.. 'నమో థాలి' పేరుతో ప్రత్యేక ఆహార పధార్థాలను తయారు చేశారు.
నమో థాలి మిఠాయి, నమో థాలి సూరి అనే రెండు రకాల వంటకాలను భోజన ప్రియుల కోసం అందిస్తున్నారు. నేతితో చేసే ఈ వంటకాలు ఎక్కువగా భారత్ లో మాత్రమే లభిస్తాయి. వివిధ రకాల పచ్చళ్లు కూడా కిరణ్ వర్మ.. ఈ నమో థాలి జాబితాలో ఉంచారు.
నమో థాలి మిఠాయిలో శ్రీఖండ్, రసమలై, క్యారట్ హల్వా, బాదం హల్వా ఉన్నాయి. నమో థాలి సూరిలో కిచిడీ, కచోరి, మేతి, తెప్లా ఉన్నాయి. భారత్ లో వివిధ రాష్ట్రాల్లో ప్రాచుర్యం చెందిన వంటలను ప్రధాని మోడీ మెనూలో చేర్చినట్లు కిరణ్ వర్మ వివరించారు. మోడీపై ఉన్న అభిమానంతోనే తాను ఈ విధమైన వంటకాలను సిద్ధం చేసినట్లు ఆమె తెలిపారు.