రన్వేపై ఫైటర్ జెట్ ఇంజిన్లో మంటలు, బయటకు దూకిన ఫైలెట్
జకార్తా: ఇండోనేషియాలో పెద్ద ప్రమాదం తప్పింది. రాజధాని జకార్తా విమానాశ్రయంలో టేక్ ఆఫ్కు సిద్ధమవుతున్న విమాన ఇంజిన్లో మంటలు చెలరేగాయి. దీంతో అప్రమత్తమైన పైలెట్ వెంటనే విమానం నుంచి బయటకు దూకేశాడు. దీంతో చిన్న గాయాలతో బయటపడ్డ పైలెట్ని చికిత్స నిమిత్తం సమీపంలోని ఆసుపత్రికి తరలించినట్లు అధికారులు తెలిపారు.
ఎయిర్ ఫోర్స్ ఛీఫ్ ఆఫ్ స్టాప్ ఆగుస్ సుప్రితానా అక్కడి స్ధానిక మీడియాకు తెలిపిన వివరాలిలా ఉన్నాయి. F-16 ఫైటర్ జెట్ ఇంజిన్లో మంటలు చెలరేగి దట్టమైన పొగ వ్యాపించడంతో పైలెట్ టేక్ ఆఫ్ను ఆపేసి కాక్ పిట్ నుంచి బయటకు దూకేశాడని అన్నారు.
ఈ ఘటనపై విచారణ చేపట్టినట్లు అధికారులు తెలిపారు. అదే సమయంలో ఫైటర్ జెట్ పక్కనే టేక్ ఆప్ అవుతున్న మరో మూడు విమానాలు సురక్షితంగా టేక్ ఆఫ్ అయినట్లు తెలిపారు. గురువారం మంటలు చెలరేగిన F-16 ఎయిర్క్రాఫ్ట్ వచ్చే వారం ఇండోనేషియాలో ఆసియా, ఆప్రికా దేశాధినేతల సదస్సు జరగనున్న నేపథ్యంలో భద్రతా ఏర్పాట్లను అందించడానికి సిద్ధమైంది.