టేకాఫ్కు రెడీ అయిన ఫ్లైట్.. విమానం రెక్కపైకి ఎక్కి షాకిచ్చిన దుండగుడు (వీడియో)
నైజీరియాలో ఓ వ్యక్తి విమాన ప్రయాణీకులకు షాక్ ఇచ్చాడు. టేకాఫ్కు సిద్ధమైన విమానం రెక్కపైకి ఎక్కి నిలబడ్డాడు. దీంతో విమాన సిబ్బందితో పాటు ప్రయాణీకులు ఆందోళనకు గురయ్యారు. ప్రస్తుతం ఈ వీడియో ఇంటర్నెట్లో వైరల్గా మారింది.
జులై 19న నైజీరియా ఐకెజాలోని ముర్తలా ముహమ్మద్ ఎయిర్పోర్ట్లో అజ్మన్ ఎయిర్ ఫ్లైట్ టేకాఫ్కు సిద్ధమైంది. ఇంతలో రన్ వే పక్కనే ఉన్న పొదల నుంచి ఓ వ్యక్తి అకస్మాత్తుగా విమానం వైపు పరిగెత్తుకుంటూ వచ్చాడు. అది గమనించిన పైలెట్ విమాన ఇంజన్ నిలిపివేశాడు. ఇంతలో విమానం పైకి ఎక్కిన ఆ దుండగుడు వెంట తెచ్చుకున్న బ్యాగ్ను ఫ్లైట్ ఇంజన్ పైన పెట్టి విమానం రెక్కపైకి ఎక్కి నిలబడ్డాడు. అది గమనించిన విమాన సిబ్బందితో పాటు ప్యాసింజర్లు షాక్కు గురయ్యారు. ఏం జరుగుతుందోనని భయంతో వణికిపోయారు.
దుండగుడు ఫ్లైట్ పైకి ఎక్కి నిలబడటంతో దాదాపు 30 నిమిషాల పాటు హైడ్రామా కొనసాగింది. అనంతరం సెక్యూరిటీ సిబ్బంది అతన్ని అదుపులోకి తీసుకున్నారు. ఈ ఘటనతో ప్రయాణీకులు భయపడిపోవడంతో వారందరినీ విమానం నుంచి దింపేశారు. తర్వాతి విమానంలో వారిని గమ్యస్థానాలకు చేర్చారు.