లైంగిక వేధింపులపై నోరువిప్పుతున్న మహిళలు! ట్రెండింగ్ గా మారిన #MeToo
లైంగిక వేధింపులకు గురైన మహిళలంతా బయటకు రావాలని, ఇందుకోసం #MeToo అనే ట్యాగ్ను ఉపయోగించాలని అమెరికన్ నటి అలిసా మిలానో కోరారు. దీనికి మహిళా లోకం స్పందించింది.
వాషింగ్టన్: ప్రముఖ హాలీవుడ్ నిర్మాత హార్వీ వీన్ స్టెయిన్ లైంగిక వేధింపులు ఒక్కొక్కటిగా వెలుగులోకి వస్తున్న సంగతి తెలిసిందే. అతడు తమను లైంగికంగా వేధించాడంటూ ఇప్పటి వరకు దాదాపు 30 మంది నటీమణులు తమ అనుభవాలను బయటపెట్టారు.
దీంతో హార్వీ వృత్తిగత, దాంపత్య జీవితానికి దూరమయ్యారు. వారంతా తమకు జరిగిన అన్యాయాన్ని బట్టబయలు చేయడం వల్లే ఇది సాధ్యమైందని సోషల్ మీడియాలో ప్రచారం జరిగింది. ఈ నేఫథ్యంలోనే లైంగిక వేధింపులకు గురైన మహిళలంతా బయటకు రావాలని అమెరికన్ నటి అలిసా మిలానో కోరింది. ఇందుకోసం #MeToo అనే ట్యాగ్ను ఉపయోగించాలని కోరింది.
నటి అలిసా మిలానో చొరవకు చాలా మంది మహిళలు స్పందించారు. సెలెబ్రిటీలు, సాధారణ మహిళలు ఇలా ప్రతి ఒక్కరూ తమకు జరిగిన లైంగిక వేధింపుల గురించి ధైర్యంగా గళం విప్పుతున్నారు.
సినిమా, రాజకీయం, కార్పొరేట్, ఐటీ ఇలా అన్ని రంగాల్లో పనిచేస్తున్న మహిళలు తమకు వివిధ చోట్ల జరిగిన వేధింపుల పర్వాన్ని ఆన్ లైన్ లో పంచుకుంటున్నారు. వీరంతా #MeToo ట్యాగ్ ద్వారా ప్రచారం చేస్తుండడంతో కొద్దిగంటల్లోనే ఈ #MeToo సోషల్ మీడియాలో ట్రెండింగ్గా మారింది.