షాకింగ్: చిన్న బ్రెడ్డు ముక్క దొంగిలించిందని.. బలవంతంగా మద్యం తాగించి, సజీవంగా కాల్చి...
చైనాకు చెందిన షీ అనే వ్యక్తి ఒకరోజు తన ఇంట్లోంచి ఓ ఎలుక చిన్న బ్రెడ్డు ముక్క దొంగిలించడం గమనించాడు. దీంతో అతడికి కోపం వచ్చింది. ‘ఓహో.. నువ్వు నా బ్రెడ్డు తింటావా.. ఇప్పుడు చూడు నిన్నేం చేస్తానో..’
బీజింగ్: చిన్న బ్రెడ్డు ముక్క దొంగిలించిన పాపానికి పెద్ద శిక్షే విధించాడు ఓ వ్యక్తి. అతడు శిక్ష విధించింది కూడా మనిషికి కాదు, ఓ మూగజీవానికి, అందులోనూ ఓ చిన్న ఎలుకకు. వినడానికి ఆశ్చర్యంగా ఉన్నా ఇది నిజం. ఈ ఘటన గురువారం వెలుగులోకి వచ్చింది.
వివరాల్లోకి వెళితే.. చైనాకు చెందిన షీ అనే వ్యక్తి ఒకరోజు తన ఇంట్లోంచి ఓ ఎలుక చిన్న బ్రెడ్డు ముక్క దొంగిలించడం గమనించాడు. దీంతో అతడికి కోపం వచ్చింది. 'ఓహో.. నువ్వు నా బ్రెడ్డు తింటావా.. ఇప్పుడు చూడు నిన్నేం చేస్తానో..' అంటూ ఎలాగైతేనేం ఆ ఎలుకను పట్టుకున్నాడు.
ఆ తరువాత దానికి బలవంతంగా బైజియు అనే బ్రాండ్ మద్యం తాగించాడు. ఆపైన పాపం దాన్ని మంటపై ఉంచి బతికుండాగానే మంటలో కాల్చాడు. ''చూడు చూడు.. బ్రెడ్డు తిన్నావు.. వైన్ తాగావు.. ఇప్పుడు మంట వేడిని కూడా అనుభవించు..'' అంటూ తనలోని క్రూరత్వాన్ని బయటపెట్టాడు.
అంతేకాదు, దీనినంతటినీ తన మొబైల్ ఫోన్ లో వీడియో తీసి దాన్ని సోషల్ మీడియాలో షేర్ చేశాడు. క్రూరంగా మనుషులను చంపిన వాళ్ల గురించి విన్నాం.. చూశాంగానీ.. ఇదేంటి? మూగ జీవాన్ని కూడా ఇంతటి చిత్ర హింసకు గురిచేస్తారా? ఉంటారు మరి ఇలాంటి వాళ్లు కూడా, వీడియో చూసి నమ్మక తప్పదు.