ఆయనొక హిట్లర్, మేమూ అణుబాంబు సంపాదిస్తాం: సౌదీ యువరాజు సంచలన వ్యాఖ్యలు..
రియాద్ : సౌదీ అరేబియా యువరాజు మొహమ్మద్ బిన్ సల్మాన్ సంచలన వ్యాఖ్యలు చేశారు. వీలైనంత త్వరలో సౌదీ అరేబియా కూడా అణుబాంబును సంపాదిస్తుందని ఆయన కలకలం రేపారు. ఇటీవలే లెబనాన్లో పర్యటించిన ఆయన ఓ టీవీ చానెల్కు ఇచ్చిన ఇంటర్వ్యూలో ఈ మేరకు వ్యాఖ్యానించారు.
ఆ ఇంటర్వ్యూలో యువరాజు మొహమ్మద్ బిన్ సల్మాన్ మాట్లాడుతూ.. పరోక్షంగా ఇరాన్ను హెచ్చరిస్తూ ఈ వ్యాఖ్యలు చేశారు. ఇరాన్ అధినేత అలీ ఖమెనెయ్ను నియంత అడాల్ఫ్ హిట్లర్తో పోల్చారు. ఇరాన్ అణ్వాయుధాలను అభివృద్ధి చేసినట్లయితే సౌదీ కూడా వీలైనంత త్వరగా అణుబాంబును సంపాదిస్తుందని వ్యాఖ్యానించారు.
రెచ్చగొట్టే ఈ వ్యాఖ్యలు ఇరు దేశాల మధ్య వైరాన్ని మరింత పెంచేలా కనిపిస్తున్నాయి. మధ్య ప్రాచ్య దేశాలపై పట్టుకోసం ప్రయత్నిస్తున్న ఇరాన్, సౌదీ అరేబియాలు విరోధులుగా మారాయి. పరస్పరం కయ్యానికి కాలుదువ్వుతున్నాయి. ఈ నేపథ్యంలో సౌదీ యువరాజు రెచ్చగొట్టే ఈ వ్యాఖ్యలు ఎలాంటి పరిస్థితులకు దారితీస్తాయో అనే ఆందోళనలు వ్యక్తమవుతున్నాయి.