చిన్న కారణం.. అతిపెద్ద శిక్ష..! పాకిస్తాన్ లో దారుణాతి దారుణమైన దుశ్చర్య..!
ఇస్లామాబాద్/హైదరాబాద్ : కొన్ని దేశాల్లో మరణ శిక్షలు చాలా దారుణంగా ఉంటాయి. కాకపోతే ముద్దాయిలు చేసే తప్పులను బట్టి శిక్షలలోని కఠినత్వం అమలుచేస్తుంటారు. కాని పాకిస్తాన్ లో చోటుచేసుకున్న ఓ శిక్షకు సంబందించిన అంశాన్ని తెలుసుకుంటే మాత్రం ఒళ్లు జలదరించక మానదు. అత్యంత హృదయ విదారకమైన ఘటన ఇద్దరు అమ్మాయిల పాశవిక హత్యలు వెలుగులోకి తెచ్చింది. ఈ విషాద ఘటన పాకిస్తాన్ లో చోటుచేసుకుంది. ప్రపంచంలో ఎక్కడా జరగని ఇలాంటి ఆకృత్యాలన్నీ కూడా ఈ పాకిస్తాన్ దేశంలోనే జరుగుతాయి. ఉగ్రవాదం, కుల వివక్ష, హత్యలు.. ఇలా ఒకటేమిటి అక్కడ జరిగేవన్నీ కూడా సభ్యసమాజం తలదించుకునే విధంగా ఉంటాయి. తాజాగా అక్కడ జరిగిన ఓ దారుణ ఘటన సభ్య దేశాలను నెవ్వరపోయేలా చేసింది. అబ్బాయితో మాట్లాడారని ఇద్దరు అమ్మాయిలను దారుణంగా హత్య చేశారు వారి బంధువులు.
ఇదిలా ఉండగా పోలీసుల కధనం ప్రకారం, పాకిస్తాన్లోని ఉత్తర వాయువ్య గిరిజన ప్రాంతంలో ఈ హత్యలు జరిగినట్లు తెలుస్తోంది. నాలుగు రోజుల క్రితం పదహారు, పద్దెనిమిది సంవత్సరాల వయసు కలిగిన ఇద్దరు బాలికల హత్యకు గురయ్యారు. ఆ ఇద్దరు అమ్మాయిలను వారి కుటుంబసభ్యులే హతమార్చారని ప్రాధమిక విచారణలో తేలింది. ఇద్దరు నిందితులను అదుపులోకి తీసుకున్నారు. వారు బాధితుల్లో ఒకరి తండ్రి కాగా, మరొక బాధితురాలి సోదరుడు అని నిర్ధారించారు పోలీసులు. తాజాగా ఏడాది క్రితానికి సంబంధించిన ఓ వీడియో సామాజిక మాధ్యమాల్లో వైరల్ అయింది. అందులో ఓ అబ్బాయి, ముగ్గురు అమ్మాయిలతో కలిసి మాట్లాడుతున్నాడు. దాన్ని జీర్ణించుకోలేక వీడియోలోని ఇద్దరు అమ్మాయిలను వారి కుటుంబసభ్యులు దారుణంగా హత్య చేశారు. ఇక ఆ వీడియోలో ఉన్న మూడో అమ్మాయి ప్రస్తుతం బ్రతికే ఉందని, ఆమె ప్రాణానికి ప్రమాదం ఉన్నట్లు పోలీసులు తెలిపారు. మూడో అమ్మయికి రక్షణ కల్పించే పనిలో పడ్డారు పాక్ పోలీసులు.