షాక్: భర్తతో గొడవ, కారు దిగిన భార్యను లాక్కెళ్లి చంపిన పులి
బీజింగ్: వైల్డ్ లైఫ్ పార్కులో.. కుటుంబంతో కలిసి కారులో ప్రయాణిస్తున్న ఓ మహిళ తన కారు డ్రైవింగ్ సీటు నుంచి దిగి, మరో డోర్ తెరిచింది. అదే సమయంలో ఊహించని విధంగా, వెనుక నుంచి పులి వచ్చి ఆమెను ఎత్తుకెళ్లింది. ఆమెను కాపాడే ప్రయత్నంలో ఇద్దరు గాయపడ్డారు. ఆమె మృతి చెందింది.
ఈ సంఘటన చైనా రాజధాని బీజింగ్ యాంక్వింగ్ జిల్లా గ్రేట్ వాల్కు సమీపంలోని బడాలింగ్ వైల్డ్ పార్క్ వద్ద జరిగింది. సదరు మహిళ కారు ఆపిన ప్రదేశం వన్య ప్రాణులు బాగా తిరిగే ప్రదేశం. ఆ చుట్టుపక్కల కార్లు ఉన్నాయి. పార్కు నుంచి పులి ఎలా బయటకు వచ్చిందో.. కానీ ఆమె మృత్యువాత పడింది.
ఈ పార్కులో కేవలం కార్లలో మాత్రమే సందర్శకులు తిరగవచ్చునని తెలుస్తోంది. ఎవరు కిందకు దిగేందుకు అనుమతి లేదు. పార్కులోని భద్రతా దళాలు క్షణాల్లో స్పందించి పులిని వెంటాడినప్పటికి ఆమె ప్రాణాలు దక్కలేదు.
ఈ ఘటనతో పార్కును తాత్కాలికంగా మూసివేస్తున్నట్లు తెలిపారు. కాగా, వైల్డ్ లైఫ్ పార్కులో కారులో ప్రయాణిస్తున్న సమయంలో ఆ మహిళ తన భర్తతో గొడవపడిందని, ఆ తర్వాత ఆమె కారు దిగిందని, ఆ సమయంలో పులి ఎత్తుకెళ్లిందని అంటున్నారు.
ఆ కారులో ఇద్దరు మహిళలు, ఓ పురుషుడు ఉన్నారు. వారు కారు దిగి సాయం చేసేందుకు ప్రయత్నించే లోపే.. ఎత్తుకెళ్లిన పులితో పాటు మరో పులి కూడా దాడి చేసి ఆమెను చంపేశాయి. పెద్దపులి దాడి దృశ్యాలు సీసీ టీవీ కెమెరాకు చిక్కాయి.