ట్రంప్ ప్రభుత్వం మరో కొత్త నిర్ణయం... హెచ్-1బీ జీవిత భాగస్వాములకు ఇబ్బందులే
హెచ్-1బీ వీసాల విషయంలో ట్రంప్ ప్రభుత్వం మరో కొత్త నిర్ణయం తీసుకోబోతోంది. హెచ్-1బీ వీసాదారుల జీవిత భాగస్వాములు అమెరికాలో ఉద్యోగాలు చేయకుండా ఉండే విధంగా చర్యలు తీసుకోనుంది.
న్యూయార్క్: హెచ్-1బీ వీసాల విషయంలో ట్రంప్ ప్రభుత్వం మరో కొత్త నిర్ణయం తీసుకోబోతోంది. హెచ్-1బీ వీసాదారుల జీవిత భాగస్వాములు అమెరికాలో ఉద్యోగాలు చేయకుండా ఉండే విధంగా చర్యలు తీసుకోనుంది.
హెచ్-1బీ వీసాల జారీ కఠినతరం చేసేందుకు ఇప్పటికే అమెరికా పలు ఆంక్షలను విధిస్తూ వచ్చింది. దీనికి సంబంధించి ఇటీవలే అమెరికా కాంగ్రెస్ చట్ట సభలో బిల్లును ప్రవేశపెట్టగా.. అందుకు ఆమోదం ముద్ర కూడా పడింది.
ఇప్పుడు మళ్లీ ట్రంప్ ప్రభుత్వం మరో కొత్త నిర్ణయం తీసుకోబోతుంది. హెచ్-1బీ వీసాదారుల జీవిత భాగస్వాములు అమెరికాలో ఉద్యోగాలు చేయకుండా ఉండే విధంగా చర్యలు తీసుకోనుంది. ఈ విషయాన్ని యూఎస్ డిపార్ట్మెంట్ ఆఫ్ హోంల్యాండ్ సెక్యూరిటీ(డీహెచ్ఎస్) అధికారికంగా వెల్లడించింది.
ట్రంప్ ప్రభుత్వం అవలంభిస్తున్న 'బై అమెరికన్, హైర్ అమెరికన్' పాలసీ విధానంలో భాగంగానే ఈ నిర్ణయం తీసుకున్నట్లు తెలుస్తోంది. అయితే.. ఈ నిబంధన తీసుకురావడానికి గల కారణాలను డీహెచ్ఎస్ వెల్లడించలేదు.
2015లో అప్పటి అధ్యక్షుడు ఒబామా హెచ్-1బీ వీసాదారులు, గ్రీన్ కార్డు కోసం వేచి చూస్తున్న భార్య లేదా భర్త అమెరికాలో ఉద్యోగాలు చేసేందుకు అర్హులుగా నిబంధన తీసుకొచ్చారు.
ఇలాంటి వాళ్లు ఉద్యోగాలు చేసుకునేందుకు హెచ్-4 డిపెండెంట్ వీసా కింద ఒబామా ప్రభుత్వం కొత్త విధానాన్ని తీసుకొచ్చింది. ఒబామా తీసుకొచ్చిన ఈ విధానాన్ని వ్యతిరేకిస్తూ అప్పట్లోనే 'సేవ్ జాబ్స్ యూఎస్ఏ' అనే బృందం న్యాయస్థానంలో పిటిషన్ దాఖలు చేసింది.
ఈ నిబంధన అమెరికన్ల ఉద్యోగాలను దెబ్బతీస్తుందని 'సేవ్ జాబ్స్ యూఎస్ఏ' బృందం తన పిటిషన్లో పేర్కొన్నారు. అయితే ఈ విధానానికి ట్రంప్ ప్రభుత్వం ఇప్పుడు ముగింపు పలకనుంది.
ఇలా చేయడం వల్ల హెచ్-1బీ వలసదారుల జీవిత భాగస్వాములు యూఎస్లో ఉద్యోగాల చేయడం కష్టతరమవుతుంది. దీనితో పాటు హెచ్-1బీ వీసా నిబంధనల్లోనూ మార్పులు తీసుకొచ్చేందుకు ట్రంప్ ప్రభుత్వం ప్రయత్నాలు చేస్తోంది.