సిబ్బందితో ఎఫైర్.. పదవికి రాజీనామా చేసిన మహిళా నేత
వాషింగ్టన్: అమెరికా ప్రజాప్రతినిధి క్యాతీ హిల్ తన పదవికి రాజీనామా చేశారు. ఆమెపై పలు లైంగిక ఆరోపణలు రావడం హౌజ్ ఎథిక్స్ కమిటీ విచారణ చేపడుతుండటంతో ఆమె తన పదవికి రాజీనామా చేశారు. కాలిఫోర్నియా నుంచి డెమొక్రటిక్ అభ్యర్థిగా కొనసాగుతున్న 32 ఏళ్ల క్యాతీ హిల్ తన రాజీనామా లేఖను ట్విటర్లో పోస్టు చేశారు. తనపై వచ్చిన ఆరోపణల నేపథ్యంలో దేశానికి, తన నియోజకవర్గానికి, తన కమ్యూనిటీకి మంచిది కాదని చెబుతూ తను రాజీనామా చేస్తున్నట్లు ట్విటర్లో పోస్టు చేసింది.
స్పీకర్పై అత్యాచార ఆరోపణలు...! రాజీనామా చేసిన నేపాల్ స్పీకర్
ఇదిలా ఉంటే తనకు కాంగ్రెస్లో పనిచేసే సిబ్బందితో సంబంధం ఉందనేది వాస్తవమేనని అయితే అతనితో ఎలాంటి శారీరక సంబంధంకానీ లైంగిక సంబంధంకానీ లేదని క్యాతీ స్పష్టం చేశారు. ఎన్నికల ప్రచారం సందర్భంగా ఆ వ్యక్తితో పరిచయం అయ్యిందని తన ప్రచారంకు సహకరించారని చెప్పుకొచ్చింది. అయితే మీడియాలో వస్తున్న కథనాల ఆధారంగా క్యాతీని విచారణ చేస్తున్నట్లు ఎథిక్స్ కమిటీ వెల్లడించింది.
ప్రస్తుతం తాను తన భర్త నుంచి విడాకుల కోసం దరఖాస్తు చేసుకున్నట్లు చెప్పిన మహిళా ప్రజాప్రతినిధి, తన తప్పు ఏదైనా ఉంటే క్షమించాలని కోరారు. అదేసమయంలో తనపై తప్పుడు ప్రచారం చేసిన వారిపై చట్టపరమైన చర్యలు తీసుకుంటానని వెల్లడించారు.
తన భర్తే తనపై తప్పుడు ప్రచారం చేస్తున్నారనే అనుమానం ఉందని చెప్పిన క్యాతీ... తన వ్యక్తిగత ఫోటోలను బహిరంగం కావడంపై ఆమె సీరియస్ అయ్యారు. తన వ్యక్తిగత జీవితంతో ఆడుకునేందుకు ఎవరికీ హక్కులేదని చెబుతూ చట్టపరంగా దీనిపై చర్యలు తీసుకుంటానని క్యాతీ చెప్పారు. ఇదిలా ఉంటే క్యాతీ హిల్ కాంగ్రెస్లో ఆర్మ్డ్ సర్వీసెస్ అండ్ రిఫార్మ్స్ కమిటీలో వైస్ ఛైర్మెన్ బాధ్యతలు నిర్వర్తిస్తున్నారు. రిపబ్లికన్ అభ్యర్థి స్టీవ్ నైట్పై క్యాతీహిల్ విజయం సాధించారు. క్యాతీ హిల్ గెలుపొందిన స్థానంను అక్కడి రాజకీయ విశ్లేషకులు ఎంతో ప్రాముఖ్యమైన స్థానంగా చూస్తారు.