లైంగిక చర్యతోనూ ‘జికా’ వ్యాప్తి: టెక్సాస్‌లో తొలి కేసు

మియామి: ఉత్తర, దక్షిణ అమెరికాలను జికా వైరస్ హడలెత్తిస్తోంది. కాగా, ప్రమాదకరంగా వ్యాపిస్తున్న ఈ జికా వైరస్‌ లైంగిక చర్య ద్వారా కూడా వ్యాప్తి చెందుతోంది. అమెరికాలోని టెక్సాస్‌లో ఈ విధంగా జికా సోకిన తొలి కేసు నమోదైంది.

గర్భంతో ఉన్న మహిళలకు జికా వైరస్‌ సోకితే చిన్నారులు తల తక్కువ పరిమాణంతో, మెదడు సంబంధ లోపాలతో జన్మిస్తున్నారు. ఈ వైరస్‌ దోమల ద్వారా కూడా వ్యాపిస్తుంది. వైరస్‌ సోకిన వారితో లైంగికచర్య ద్వారా కూడా జికా వైరస్‌ సోకుతుందని తాజాగా టెక్సాస్‌ ఆరోగ్య విభాగం స్పష్టం చేసింది.

ప్రమాదకరమైన ఈ వైరస్‌ ఎక్కువగా లాటిన్‌ అమెరికా ప్రాంతంలో వ్యాపించింది. ఇప్పుడిప్పుడే మిగతా ప్రాంతాలకు పాకుతోంది. జికా ప్రభావిత ప్రాంతాలల్లో పర్యటించవద్దని గర్భిణిలకు సూచిస్తున్నారు.

కాగా, ఈ ఏడాది బ్రెజిల్ లోని రియోడిజనీరోలో సమ్మర్ ఒలింపిక్స్ జరగున్నాయి. అయితే, గర్భిణులు ఒలింపిక్ గేమ్స్ చూసేందుకు బ్రెజిల్ రావద్దని ఆ దేశ క్యాబినెట్ చీఫ్ జాక్వెస్ వాంగెర్ హెచ్చరించారు.

అధ్యక్షురాలు దిల్మా రౌసెఫ్ నిర్ణయం మేరకు ఉన్నతాధికారులు ఈ విషయాన్ని వెల్లడించారు. జికా వైరస్ గర్భిణులకు వ్యాపించినట్లయితే వారికి పుట్టబోయే పిల్లలు చిన్న తలతో పుట్టడం, ఇతర ప్రమాదకర వ్యాధులు చిన్నారులకు సంక్రమిస్తాయని తెలిపారు.

English summary

Zika has been sexually transmitted in Texas, the Centers for Disease Control and Prevention said Tuesday. It is the first known case of the virus being locally acquired in the continental United States in the current outbreak.