నింగిలోకి దూసుకెళ్లిన PSLV-C43.. మూడు దశలు విజయవంతం
నెల్లూరు : శ్రీహరికోట షార్ సెంటర్ నుంచి ప్రయోగించిన PSLV-C43 విజయవంతమైంది. గురువారం ఉదయం 9 గంటల 58 నిమిషాలకు ఈ రాకెట్ నిప్పులు చిమ్ముతూ నింగిలోకి దూసుకెళ్లింది. దాదాపు 28 గంటల కౌంట్ డౌన్ తర్వాత అంతరిక్షంలోకి పంపించారు ఇస్రో సైంటిస్టులు. మూడు దశలను విజయవంతంగా పూర్తిచేసుకుందని షార్ అధికారులు వెల్లడించారు. మన దేశానికి చెందిన హైపవర్ స్పెక్ట్రల్ ఇమేజింగ్ ఉపగ్రహంతో పాటు ఇతర దేశాలకు సంబంధించిన 30 ఉపగ్రహాలను కక్ష్యలోకి మోసుకెళ్లుతోంది PSLV-C43 రాకెట్.
Recommended Video
వీటిలో అత్యధికంగా అమెరికాకు చెందిన 23 ఉపగ్రహాలు ఉన్నాయి. స్పెయిన్, ఫిన్లాండ్, నెదర్లాండ్స్, కెనడా, ఆస్ట్రేలియా, కొలంబియా, మలేషియా దేశాలకు చెందిన ఒక్కో ఉపగ్రహన్ని ఈ రాకెట్ ద్వారా స్పేస్ లోకి పంపించారు. ఇవన్నీ కలిపి దాదాపు 262 కిలోల బరువు ఉంటాయి. వీటిలో 29 నానో, ఒక మైక్రో ఉపగ్రహాలున్నాయి.
మనదేశానికి చెందిన హైపవర్ స్పెక్ట్రల్ ఇమేజింగ్ ఉపగ్రహం 380 కిలోల బరువు ఉంటుంది. దీని ద్వారా 630 కిలోమీటర్ల పైభాగం నుంచి కలర్ చిత్రాలు క్లారిటీగా వీక్షించవచ్చు. భూ ఉపరితలాన్ని పరిశీలించడం, వ్యవసాయం, నీటి లభ్యత తదితర అంశాలకు సంబంధించిన పరిశోధనలకు ఈ ఉపగ్రహం ఉపయోగపడనుంది.