‘కార్పొరేటర్ల వాట్సాప్ గ్రూప్లో పోర్న్ వీడియో ఎలా వచ్చిందంటే.. సారీ’
హైదరాబాద్: జీహెచ్ఎంసీ కార్పొరేటర్ల వాట్సప్ గ్రూపులో ఓ నీలి చిత్రాన్ని పోస్టు చేసిన అంశంపై ఆరోపణలు ఎదుర్కొంటున్న కార్పొరేటర్ కిలారి మనోహర్ వివరణ ఇచ్చారు. వెంగళరావు నగర్లోని తన కార్యాలయంలో మీడియా సమావేశం ఏర్పాటుచేసి ఈ ఘటనకు సంబంధించిన వివరాలను వెల్లడించారు.
తాను ఓ ప్రారంభోత్సవ కార్యక్రమంలో ఉన్నప్పుడు తన అనుచరుడు రవి.. తన డ్రైవర్ వద్ద ఉన్న తన మొబైల్ ఫోన్ తీసుకొని ఇంటర్నెట్ వాడుకోవడంతో పొరపాటున ఆ వీడియో టీఆర్ఎస్ కార్పొరేటర్ల గ్రూప్లో పోస్టయిందని తెలిపారు. దీనికి పూర్తి బాధ్యత తనదేనని, తనను క్షమించాలని కోరారు.
ఇలాంటి ఘటనలు పునరావృతం కాకుండా చూసుకుంటానని స్పష్టం చేశారు. మూడు రోజుల క్రితం జీహెచ్ఎంసీ కార్పొరేటర్ల వాట్సాప్ గ్రూపులో పోస్టయిన నీలి చిత్రం వీడియో ఒకటి తీవ్ర కలకలం రేపిన విషయం తెలిసిందే. మహిళా కార్పొరేటర్లు దీనిపై ఫిర్యాదుకు సిద్ధమవడంతో ఈ విషయం బయటకు పొక్కింది. దీంతో జీహెచ్ఎంసీ పెద్దలు వివాదాన్ని సద్దుమణిగేలా చూసినట్లు సమాచారం.