కూతురు చూస్తుండగానే..: వివాహేతర సంబంధంతో ఘోరం జరిగిపోయింది..

తూప్రాన్: వివాహేతర సంబంధాలు కాపురాల్లో చిచ్చుపెడుతున్నాయి. భార్యా-భర్తల హత్యలకూ దారితీస్తున్నాయి. ఇటీవలి కాలంలో వివాహేతర సంబంధాల కారణంగా హత్యలకు గురవుతున్నవారి సంఖ్య పెరుగుతూ వస్తోంది. తాజాగా మెదక్ జిల్లాలోనూ వివాహేతర సంబంధం ఇద్దరిని బలతీసుకుంది.

ఏమైంది?:

కామారెడ్డిలోని పద్మాజివాడకు చెందిన ఒంటెద్దు కాశీరాం(35) వరుసకు మరదలైన దేవేంద్ర(30)కు మధ్య గత కొన్నాళ్లుగా వివాహేతర సంబంధం కొనసాగుతోంది. ఇన్నాళ్లు గుట్టుచప్పుడు కాకుండా నడిచిన ఈ వ్యవహారం ఇటీవలే బయటపడింది.

ఆమె భర్త దుబాయిలో..:

దేవేంద్ర భర్త రఘు ఉపాధి కోసం దుబాయ్‌కి వెళ్లాడు. వీరికి 5 ఏళ్ల బాబు, ఏడాది పాప ఉన్నారు. కాశీరాంకు కూడా గతంలోనే పెళ్లయినప్పటికీ.. కొన్నాళ్ల క్రితం విడాకులు కావడంతో ఒంటరిగా ఉంటున్నాడు. ఈ క్రమంలోనే దేవేంద్రతో వివాహేతర సంబంధం ఏర్పరుచుకున్నాడు.

కులపెద్దల పంచాయితీ..:

దేవేంద్ర-కాశీరాంలు కొనసాగిస్తున్న వివాహేతర సంబంధం ఇరు కుటుంబాల పెద్దలకు తెలిసి పెద్ద గొడవకు దారితీసింది. చివరకు కుల పెద్దల సమక్షంలో పంచాయితీ పెట్టగా.. కాశీరాంకు రూ.3 లక్షల వరకు జరిమానా విధించారు.

మనస్తాపంతో ఆత్మహత్య..:

దేవేంద్ర వివాహేతర సంబంధం గురించి దుబాయ్ లో ఉన్న భర్తకు తెలియడంతో.. ఇక ఆమెతో కాపురం చేసేది లేదని అతను తెగేసి చెప్పాడు. ఈ నేపథ్యంలో తీవ్ర మనస్తాపం చెందిన కాశీరాం, దేవేంద్ర బ్రాహ్మణపల్లి రైల్వేస్టేషన్‌లో గుర్తు తెలియని రైలు కింద పడి ఆత్మహత్యకు పాల్పడ్డారు.

కుమార్తె చూస్తుండగానే..:

కుమార్తెను కూడా తనతో పాటు తీసుకుపోయినప్పటికీ.. ఆ చిన్నారిని రైల్వేస్టేషన్‌ ప్లాట్ ఫామ్ పై వదిలిపెట్టి దేవేంద్ర కాశీరాంతో కలిసి ఆత్మహత్య చేసుకుంది. తన తల్లి ఆత్మహత్య చేసుకుందన్న విషయం తెలియని ఆ చిన్నారి ఫ్లాట్ ఫామ్‌పై అమాయకంగా తల్లి కోసం ఎదురుచూస్తూ కూర్చోవడం పలువురిని కలచివేసింది.

English summary

Illicit affair leads to two deaths in Medak district. Kashiram(35), Devendra(30) are committed suicide by by jumping before train