హైదరాబాద్లో సాఫ్టువేర్ ఉద్యోగి ఆత్మహత్య: ప్రేమించిన యువతికి ఐలవ్యూ అని పంపి..
హైదరాబాద్: నగరంలోని గచ్చిబౌలి ఇన్ఫోసిస్లో పని చేస్తున్న ఓ ఉద్యోగి ఆత్మహత్య చేసుకున్నాడు. 34 ఏళ్ల వయస్సున్న కిరణ్ కుమార్ మాదాపూర్లోని ఓ హాస్టల్లో ఉంటున్నాడు. తాను ఉంటున్న హాస్టల్లో ఫ్యాన్కు ఉరివేసుకొని ఆత్మహత్య చేసుకున్నాడు.
ప్రేమ విఫలమైనందునే అతను ఆత్మహత్య చేసుకున్నాడని పోలీసులు అనుమానిస్తున్నారు. ప్రేమ విఫలం కారణంగా అతను కుంగుబాటుకు గురై ఈ చర్యకు పాల్పడి ఉంటారని భావిస్తున్నారు. పోస్టుమార్టం నిమిత్తం మృతదేహాన్ని గాంధీ ఆసుపత్రికి తరలించారు. పోలీసులు కేసు నమోదు చేసుకొని దర్యాఫ్తు చేస్తున్నారు.
కిరణ్ కుమార్ సిద్దిపేట జిల్లా మిరుదొడ్డి మండలం రుద్రారం గ్రామానికి చెందినవాడు. నాలుగు నెలల క్రితం ఇన్ఫోసిస్లో చేరాడు. మాదాపూర్లోని మెన్స్ హాస్టల్లో ఉంటున్నాడు. వారం రోజులుగా విధులకు వెళ్లడం లేదు. శనివారం ఉదయం స్నేహితులు పలుమార్లు ఫోన్ చేసినా స్పందించలేదు.
అనుమానం వచ్చిన స్నేహితులు మధ్యాహ్నం హాస్టల్ గది తలుపులు బద్దలుకొట్టి చూడగా ఫ్యాన్కు ఉరివేసుకొని కనిపించాడు. కిరణ్ కొంతకాలంగా ఓ యువతిని ప్రేమిస్తున్నాడని పోలీసులు తెలిపారు. ఇటీవల ఇద్దరి మధ్య విభేదాలు ఏర్పడ్డాయి. దూరం కావడంతో శుక్రవారం అర్ధరాత్రి యువతికి ఐ లవ్యూ అని వాట్సాప్ మెసేజ్ పంపించి, ఆ తర్వాత చనిపోయాడు.