'భరత్ అనే నేను'కి కేటీఆర్ డబ్బులిచ్చారు.. అందుకే అలా!: రేవంత్

హైదరాబాద్: హీరో మహేష్ బాబు నటించిన 'భరత్ అనే నేను' సినిమా ప్రమోషనల్ కార్యక్రమాలకు మంత్రి కేటీఆర్ ను పిలవడం వెనుక వేరే కారణం ఉందన్నారు కాంగ్రెస్ నేత, ఎమ్మెల్యే రేవంత్ రెడ్డి. ఆ సినిమా రూపకర్తలకు కేటీఆర్ డబ్బులు ఇచ్చినందువల్లే ప్రమోషన్ కార్యక్రమాలకు ఆయన్ను పిలిచారని ఆరోపించారు.

సినిమాలో హీరో పేరు 'భరత్ రామ్' అని పెట్టడానికి కేటీఆర్ ఫండింగ్ చేశారని రేవంత్ ఆరోపించారు. సినిమాలో హీరో సీఎం పాత్రలో కనిపిస్తాడు కాబట్టి.. అతని పేరులో తన పేరు కలిసివచ్చేలా చూడాలని కేటీఆర్ వారికి డబ్బులు ఇచ్చినట్టు పేర్కొన్నారు.

వచ్చే ఎన్నికల్లో తెలంగాణలో టీఆర్ఎస్ ఓడిపోతుందని, ఆ తర్వాత కేటీఆర్ ఇక యాంకరింగ్ చేసుకోవాల్సిందేనని ఎద్దేవా చేశారు. కర్ణాటక ఎన్నికల్లో జేడీఎస్ పార్టీకి మద్దతు తెలిపిన కేసీఆర్.. ఇప్పుడు జేడీఎస్ ఎవరితో పొత్తు పెట్టుకోవాలో కూడా చెప్పాలని అన్నారు.

కర్ణాటకలో ఏం జరగబోతుందో అన్నదానిపై దేశమంతా ఉత్కంఠగా ఎదురుచూస్తోందన్నారు. కర్ణాటకలో బీజేపీ అక్రమంగా అధికారంలోకి రావడానికి ప్రయత్నిస్తోందని రేవంత్ ఆరోపించారు.

English summary

Congress leader, Kodangal MLA Revanth Reddy alleged that Minister KTR given money to Mahesh Babu's Bharath Ane Nenu movie team to promote his name in the movie