లిఫ్టులో చిక్కుకున్న డిప్యూటీ సిఎం, హోంమంత్రి

హైదరాబాద్: నగరంలోని ఓ ఆస్పత్రిని ప్రారంభించేందుకు వెళ్లిన తెలంగాణ ఉప ముఖ్యమంత్రి మహామూద్ అలీ, హోంమంత్రి నాయిని నర్సింహారెడ్డి లిఫ్టులో చిక్కుకున్నారు. సోమవారం ఆస్పత్రి ప్రారంభోత్సవానికి వచ్చిన వారు పై అంతస్తుకు వెళ్లేందుకు లిఫ్టు ఎక్కారు. సాంకేతిక లోపం కారణంగా ఆ లిఫ్టు మధ్యలోనే ఆగిపోయింది.

లిఫ్టు డోర్లు కూడా తెరుచుకోలేదు. దీంతో భద్రతా సిబ్బంది, ఆస్పత్రి వర్గాలు ఉరుకులు పరుగులు పెట్టాయి. సుమారు 20 నిమిషాల పాటు డిప్యూటీ సీఎం మహామూద్ అలీ, హోంమంత్రి నాయిని నర్సింహారెడ్డి లిప్టులోనే ఉండాల్సి వచ్చింది.

20నిమిషాల అనంతరం సెక్యూరిటీ సిబ్బంది లిఫ్టు డోర్లను తెరవడంతో డిప్యూటీ సీఎం, హోంమంత్రి బయటికి వచ్చారు. ఆ తర్వాత మెట్ల ద్వారానే వారు నడుచుకుంటూ పై అంతస్తుకు వెళ్లారు. కొత్తగా ప్రారంభించిన కారణంగానే లిఫ్టులో సాంకేతిక లోపం ఏర్పడిందని ఆస్పత్రి వర్గాలు తెలిపాయి.

English summary

Telangana Deputy CM Mahamood Ali and Home Minister Naini Narsimha Reddy on Monday trapped in a lift in Hospital for 20 minutes.