లిఫ్ట్‌లో ఆమెను అసభ్యంగా తాకాడు: అమీర్‌పేట మెట్రో స్టేషన్‌లో యువతికి లైంగిక వేధింపులు

హైదరాబాద్: యువతులపై లైంగిక వేధింపుల ఘటనలు ఇటీవలి కాలంలో పెరిగిపోయాయి. తాజాగా అమీర్‌పేట మెట్రో ఇంటర్‌ ఛేంజ్‌ స్టేషన్‌లో ఓ యువతి (22) లైంగిక వేధింపుల్ని ఎదుర్కొంది. వేధింపులపై ఎస్ఆర్ నగర్ పోలీసులకు యువతి ఫిర్యాదు చేయడంతో విషయం వెలుగులోకి వచ్చింది.

వివరాల్లోకి వెళ్తే.. సికింద్రాబాద్‌కు చెందిన యువతి రసూల్‌పురా వెళ్లేందుకు జేఎన్‌టీయూ మెట్రో స్టేషన్‌లో రైలెక్కింది. సికింద్రాబాద్ వైపు వెళ్లాలంటే అమీర్‌పేట ఇంటర్‌ ఛేంజ్‌ స్టేషన్‌లో రైలు మారాల్సి ఉండటంతో.. ఆ స్టేషన్‌లో దిగింది.

స్టేషన్‌లోని రెండో అంతస్తులో ఉన్న ప్లాట్ ఫామ్ పైకి వెళ్లడం కోసం లిఫ్ట్ ఎక్కింది. మెట్రో స్టేషన్‌లో టికెటింగ్‌, క్యాష్‌ మేనేజ్‌మెంట్‌ ఉద్యోగిగా పని చేస్తున్న ట్రిగ్‌ డిటెక్టివ్‌ సర్వీసెస్‌కు చెందిన నితిన్‌రెడ్డి(25) కూడా యువతితో పాటే లిఫ్ట్‌లో ఎక్కాడు.

లిఫ్టులో ఇద్దరే ఉండటంతో యువతిని అసభ్యంగా తాకాడు. పదేపదే అలా తాకి నితిన్ రెడ్డి ఆమెను వేధింపులకు గురిచేశాడు. దీంతో బాధితురాలు ఎస్ఆర్ నగర్ పోలీసులను ఆశ్రయించారు. యువతి ఫిర్యాదు మేరకు నిందితున్ని అరెస్ట్ చేసి రిమాండ్‌కు తరలించారు.

English summary

A man allegedly sexually assaulted a woman in a lift at Ameerpet metro station in Hyderabad.