పెళ్లి వేడుకల్లో తల్వార్ విన్యాసాలు: బాలుడి మెడ తెగి...
హైదరాబాద్: వినోదంలో విషాదం చోటు చేసుకుంది. పెళ్లి బరాత్లో తల్వార్లతో మైనర్లు చేసిన విన్యాసాలు (మర్ఫా డాన్స్) ఓ బాలుడి ప్రాణాలు తీశాయి. హైదరాబాద్లోని షేక్పేటలో ఈ విషాద సంఘటన చోటు చేసుకుంది.
ఈ ఘటనలో పోలీసులు 10 మందిని అదుపులోకి తీసుకున్నారు. షేక్పేటకు చెందిన సయ్యద్ హమీద్ స్థానిక పాఠశాలలో తొమ్మిదో తరగతి చదువుతున్నాడు. మిత్రులు పిలవడంతో మూడురోజుల క్రితం అతను ఓ పెళ్లి బరాత్కు వెళ్లి నృత్యం చేశాడు.
ఆ వేడుకల్లో అనుభవం లేకున్నా కత్తులు, తల్వార్లతో మైనర్లు విన్యాసాలు చేశారు. ఆ క్రమంలోనే దూసుకొచ్చిన తల్వార్ హమీద్ మెడకు తగిలింది. దాంతో తీవ్రంగా రక్తస్రావం జరిగి పడిపోయాడు.
అతన్ని దారుసలాంలోని ఓ ఆస్పత్రికి తరలించారు. చికిత్స పొందుతూ ఆదివారం అతను మరణించాడు. బాధితుడి తల్లి ఫిర్యాదుమేరకు రాయదుర్గం పోలీసులు కేసు నమోదుచేశారు.
దర్యాప్తులో భాగంగా బరాత్లో తల్వార్లతో విన్యాసాలు చేసిన 10 మందిని అదుపులోకి తీసుకున్నారు.