ఓటర్ స్లిప్ లేదని టెన్షన్ ఎందుకు దండగ...! TE-POLL యాప్ ఉండగా...!
హైదరాబాద్ : ఓటర్ స్లిప్ రాలేదని బెంగ పడొద్దంటున్నారు రాష్ట్ర ఎన్నికల సంఘం అధికారులు. కొత్తగా ప్రవేశపెట్టిన TE-POLL యాప్ తో మీ ఓటర్ స్లిప్పులు మీరే పొందొచ్చని చెబుతున్నారు. దేశంలో ఎక్కడా లేని విధంగా మన రాష్ట్రంలో తొలిసారిగా ఈ సరికొత్త యాప్ అందుబాటులోకి వచ్చింది.
పంచాయతీ ఎన్నికల ప్రక్రియను స్పెషల్ సాఫ్ట్వేర్ తో నిర్వహిస్తున్నారు. అందులోభాగంగా TE-POLL యాప్ ను తెరపైకి తెచ్చారు. ఓటర్లకు ఇబ్బందులు కలగకుండా.. ఓటర్ స్లిప్పుల కోసం ఎక్కడెక్కడో తిరగకుండా ఉన్నచోటు నుంచే డౌన్ లోడ్ చేసుకునే వెసులుబాటు కల్పించారు.
ఆండ్రాయిడ్ ఫోన్లల్లో గూగుల్ ప్లే స్టోర్ నుంచి TE-POLL యాప్ డౌన్లోడ్ చేసుకోవచ్చు. యాప్ ఓపెన్ చేసి జిల్లాతో పాటు ఓటర్ ఎపిక్ నంబర్ ఎంటర్ చేస్తే చాలు.. ఓటర్ స్లిప్పులు డౌన్లోడ్ అవుతాయి. ఈ యాప్ ను తొలిసారిగా తెలంగాణలోనే వినియోగిస్తున్నారు. పంచాయతీ ఎన్నికల సమాచారం అందరికీ అందుబాటులో ఉంచాలనే ఉద్దేశంతో ఇప్పటికే tsec.gov.in అనే వెబ్ సైట్ ను అందుబాటులో ఉంచారు ఎన్నికల సంఘం అధికారులు. పంచాయతీ తొలివిడత ఎన్నికలు ఈనెల 21న ప్రారంభం కానున్నాయి. అయితే ఓటర్ స్లిప్పులు రాలేదని కంగారు పడకుండా ఈ యాప్ తో డౌన్లోడ్ చేసుకోవాలని అధికారులు సూచిస్తున్నారు.