పేరుకు బేకరీ.. లోపల 'పోర్న్' దందా: అశ్లీల సీడీల బాగోతం బట్ట బయలు..
పైకి చూడటానికి అదో బేకరీ లాగా కనిపించినా.. లోపల మాత్రం అశ్లీల చిత్రాలకు సంబంధించిన వ్యాపారం జరుగుతోంది.
కరీంనగర్: కరీంనగర్ జిల్లా కేంద్రంలో గుట్టు చప్పుడు కాకుండా నిర్వహిస్తున్న అశ్లీల సీడీల దందాను పోలీసులు బయటపెట్టారు. ఇందుకోసం ఓ బేకరీని అడ్డాగా మలుచుకుని అక్కడి నుంచే సీడీల విక్రయాలు జరుపుతుండటం గమనార్హం.
పైకి చూడటానికి అదో బేకరీ లాగా కనిపించినా.. లోపల మాత్రం అశ్లీల చిత్రాలకు సంబంధించిన వ్యాపారం జరుగుతోంది. రెండేళ్లుగా ఈ అక్రమ దందాను కొనసాగిస్తున్నట్లు పోలీసులు గుర్తించారు. దీనిపై సమాచారం అందుకున్న పోలీసులు.. ఎట్టకేలకు నిర్వాహకులను అరెస్ట్ చేశారు.
శ్రీమహాలక్ష్మి ఫుడ్ వరల్డ్ బేకరీ:
కరీంనగర్లోని శాస్త్రి రోడ్డులో ఉన్న శ్రీమహాలక్ష్మి ఫుడ్ వరల్డ్ అనే బేకరీ ఉంది. వావిలాలపల్లికి చెందిన గుర్రం శ్రీపాల్రెడ్డి ఈ బేకరీని నడుపుతున్నాడు. ఇదే బేకరీలో శ్రీపాల్ అనుచరుడు కిసాన్నగర్కు చెందిన పుల్లూరి వినీత్ అశ్లీల చిత్రాల సీడీలు రూపొందిస్తున్నాడు.
ఒక్క సీడీ రూ.150:
బేకరీలోనే ఒక కంప్యూటర్ను ఏర్పాటుచేసుకుని పుల్లూరి వినీత్ ఇంటర్నెట్ ద్వారా అశ్లీలచిత్రాలను డౌన్లోడ్ చేస్తున్నాడు. ఆపై వాటిని సీడీలుగా రూపొందించి దుర్గమ్మగడ్డకు చెందిన మహ్మద్ తాజ్తో ఒక్కటి 150 రూపాయలకు విక్రయిస్తున్నారు.
304సీడీలు స్వాధీనం:
ఈ అశ్లీల సీడీల దందాకు సంబంధించిన సమాచారం అందడంతో కరీంనగర్ టాస్క్ఫోర్స్ బృందం, కరీంనగర్ వన్ టౌన్ పోలీసులు కలిసి బేకరీపై దాడులు చేశారు. నిందితులు శ్రీపాల్రెడ్డి, వినీత్, తాజ్లను అరెస్టు చేశారు. వారి వద్ద నుంచి ఒక కంప్యూటర్, మానిటర్, హోంథియేటర్, సెల్ఫోన్, మెమోరీ కార్డు 304 సీడీలను స్వాధీనం చేసుకున్నారు.
యువతను చెడగొట్టి:
తమ అశ్లీల సీడీల విక్రయాల కోసం నిందితులు చాలామంది యువకులకు గాలం వేసినట్లు తెలుస్తోంది. యువతను చెడు అలవాట్లకు గురిచేసి అడ్డగోలుగా సంపాదించినట్లు పోలీసులు గుర్తించారు. ఇన్ఫర్మేషన్ టెక్నాలజీ ఆక్ట్ 2000 కింద ముగ్గురు నిందితులపై సుమోటో కేసు నమోదు చేశారు.