మిన్నెసోటాలో ఘనంగా తెలుగు ఉగాది వేడుకలు

మిన్నెసోటా: తెలుగు అసోషియేషన్‌ ఆఫ్‌ మిన్నెసోటా(టీఈఏఎం) ఆధ్వర్యంలో బ్లూమింగ్టన్‌ జఫర్సన్‌ హైస్కూల్‌లో ఉగాది వేడుకలు ఘనంగా నిర్వహించారు. విఘ్నేశ్వరుని ప్రార్థనతో ఉగాది సంబరాలు ప్రారంభమయ్యాయి. టీఈఏఎం సమన్వయ కర్త శైలజ కార్యక్రమానికి విచ్చేసిన ముఖ్య అతిథులకు, ప్రవాసాంధ్రులకు స్వాగత శుభాకాంక్షలు తెలిపారు. ఈ సందర్భంగా ఏర్పాటు చేసిన సాంస్కృతిక కార్యక్రమాలకు ప్రవాసుల నుంచి విశేష స్పందన వచ్చింది. టీఈఏఎం అధ్యక్షులు వసంత్‌ చాగంటి ఈ సందర్భంగా మాట్లాడుతూ...తమ సంస్థ ద్వారా నిర్వహించే పనులను గురించి వివరించారు.

తెలుగు సంస్కృతి సంప్రదాయాలను విదేశాల్లో కాపాడానికి తామందరం విశేషంగా కృషి చేస్తున్నట్లు తెలిపారు. ఉపాధ్యక్షులు హరి పల్లెంపాటి తమ సంస్థ నూతన వెబ్ ‌సైట్‌ ను ప్రారంభించారు. కార్యక్రమం విజయవంతం కావడానికి సహకరించిన వారందరికీ టీఈఏఎం జనరల్‌ సెక్రటరీ పూర్ణ గుర్రం కృతజ్ఞతలు తెలిపారు. ఈ కార్యక్రమంలో కమిటీ సభ్యులు సుధీర్‌, పద్మ, నాయుడు, ఈశ్వర్‌, సూర్య, రమేష్‌, రాజు, దుర్గా, మూర్తి, రామ్‌, శిరీషా, కిషోర్‌, శ్రీనివాస్‌, తదితరులు పాల్గొన్నారు.