ఎన్నాళ్లెకెన్నాళ్లకీ వాన

చినుకు చినుకు పట్టుకొని

చివరి దాకా ఎగబాకాలని ఉంది

ఆకాశం అంచులో కూచుని

భూమిని కళ్లారా చూడాలి

జలాశయాలు సెలయేళ్లు

కొండలు గుట్టలు పర్వతాలు

కీకారణ్యాలు మైదానాలు

ఏ మేరకు ఉన్నాయో చూడాలి

పక్షులు, జంతువులు సరీసృపాలు

ఎన్నెన్ని ఒద్దిగ్గా జీవిస్తున్నాయో

జలచరాలు కీటకాలు

పంచ వర్ణాల ఫలపుష్పాలు

అన్నిటినీ చూడాలంటే ఎలా మరి

అందుకే చినుకు చినుకు పట్టుకొని

ఆకాశం అంచుదాకా పాకాలి

ఎడతెగని వర్షం పడుతూనే ఉంది

ఎన్నాళ్లకెన్నాళ్లకు వచ్చిందీ వాన

భూమ్మీద ఇన్ని ప్రాణుల తాపం తీరాలి

ఈ వర్షం ఇలా పడుతూనే ఉండాలి

ఈ లోపల చినుకు చినుకు పట్టుకొని

నేను చివరి దాకా వెళ్లి రావాలి

ఈ వర్షం ఇలా పడుతూనే ఉండాలి