• search
  • Live TV
వేగవంతమైన అలర్ట్స్ కోసం
నోటిఫికేషన్స్ పై క్లిక్ చేయండి  
For Daily Alerts

తెలుగు కవిత: చివరి భోజనం

By Pratap
|

నరాల దిరిసెన తీగల్ని

నిర్దాక్షిణ్యంగా చిట్లించడం కోసం

నాణ్యమైన తాడు పేనడం వింత

రక్తదాహపు రాచక్రీడను

తెల్లని బట్టల్ని నిండారా తొడిగించి

రక్తి కట్టించడం నటన

కసాయిలా కుత్తుకను ఉత్తరించే ముందు

కమ్మని చివరి భోజనపు కన్నీళ్లను పెట్టించడం

అమానుష పరిహాసం

ఉరి

నేరం కన్నా

వికృత రూపం

దోషం జరిగే ఉండొచ్చు

తెలిసి పట్టినా

తెలియక ముట్టినా

నిప్పు కాలుతూనే ఉంటుందన్న

వివేచనకు అవకాశం లేని

విచిత్రమైన లోకంలో

దైన్యంగా చౌర్యం చేసిన

బాల్యముంటుంది

యవ్వనం చిక్కుముడి

విప్పడం అర్థం కాక

ఉద్రేకంగా బిగించిన

కౌమార్యం ఉంటుంది

ఆవేశం చానలైజ్ చేసుకోలేక

దారి తప్పిన ఉద్రేకాన్ని

ఉపయోగించుకునే

స్వదేశీ, విదేశీ మతలబు ఉంటుంది

అంతర్లనంగా

అంతర్జాతీయ రిమోట్ ఉంటుంది

మూలం

దృశ్యం కంటే భిన్నంగా ఉంటుంది

కాలంం వీచే గాలిలో

అప్పుడప్పుడు అంతు చిక్కని

విషవాయువులు దొర్లుతాయని

విద్వేషాలు రగుల్తాయని

జీవన్మరణ సంధిలో గాని

తెలియకుండా ఉంటుంది

ధ్వంసానికి మూలాలు

ఛేదించలేని దర్పాలు

శిక్షల మెలిపొరలను

సమర్థంగా కప్పుకుంటాయి

Anugu Narsimha Reddy's poem the last meal

నేరం వెనుక ఆకలి

ఘోరం వెనక కుట్ర

ఛేదించడం సులభం కాకపోవచ్చు

మన్నించరాని నేరాన్ని మన్నించి

ఆజన్మ బందీ చేయవచ్చు

లోకం నుండి ఐసోలేట్ చేసి

క్షణం క్షణం ఆత్మావలోకనం కలిగించవచ్చు

ఏ గీతనూ చదవకుండా

పండంటి జీవితాన్ని

పరిణతి దిశగా పయనింపజేయవచ్చు

జీవన వేదనలన్నీ

గుక్క పట్టిన సంవేదనం మరణం

ప్రకటన నుండే మొదలయ్యే నరకం

అత్యున్నత శిక్ష

ఇక జారిపోయిన బండి ఇరుసులా

చెదిరిపోయిన జ్ఞాపక శకలాలన్నీ

తలుచుకునే సమయం ఉండదు

తన్నుకుని దుఖ్కించడానికి

పరుచుకున్న తల్లి ఒడి ఉండదు

చెంపల మీద కాల్వల నీరు

తుడిచే ప్రియురాలి స్పర్శ ఉండదు

ఆడిన నేస్తం

పాడిన పరవశపు జ్ఞాపకమూ

చిన్ననాటి చందమామ

కలిమెలిగిన బుజ్జిమేక

ఊయలలూపిన కుక్కి మంచం దరికి రావు

దుఖ్కం

ఒంటరి దుఖ్కం

పంచుకోలేని నిర్వచించుకోలేని దుఖ్కం

నలువైపులా ఆవరించుకున్న

నల్లని రాతి గోడలకూ అలవి కాని దుఖ్కం

preplanned cruel murder

Resulted in capital punishment

కార్యం వెనుకనున్న కారణం

ఎవరికీ పట్టదు

క్షమాభిక్ష తిరస్కారం

ప్రాసిక్యూషన్ అభీష్టమే

ఏదైనా అమాయకత్వం కలిసిందా అన్న

వివేచన తెలయని తలారి

దుఖ్కంతోనే పని పూర్తి చేస్తాడు

రాజ్యం దర్పంగా ముందుకు నడుస్తుంది

దైవం మాత్రమే

విధించవలసిన శిక్ష అది

రాజుల చొరబాటును

ధిక్కరించవలసిందే

మరణశిక్ష

మధ్య యుగాల

రాక్షస దాహం

పగతో ఊగే

రాజ్యం దించే

ప్రకటిత గునపం

దాన్ని ఎదిరించవలసింందే

- ఏనుగు నరసింహా రెడ్డి

English summary
A prominent poet Anugu Narasimha Reddy opposes capital punishment in his poem Chivari Bhojanam (last meal).
న్యూస్ అప్ డేట్స్ వెంటనే పొందండి
Enable
x
Notification Settings X
Time Settings
Done
Clear Notification X
Do you want to clear all the notifications from your inbox?
Settings X