• search
  • Live TV
వేగవంతమైన అలర్ట్స్ కోసం
నోటిఫికేషన్స్ పై క్లిక్ చేయండి  
For Daily Alerts

కవిస్వరం: శ్రీకాంత్ కవిత

By Pratap
|

ఒంటరి దుఖ్కం గురించి, ఒంటరి వేదన గురించి చాలా మంది కవులే రాశారు. ఎవరు రాసినా ఓ తాజా అనుభూతిని అది కలిగిస్తుంది. సమూహంలోనూ మనిషి ఒంటరిగానే మిగిలే దుఖ్కం గురించి మాత్రం చాలా తక్కువ కవితలే వచ్చాయి. జీవితం ఒంటరిగానే సాగుతుందనే ఎరుక నుంచి శ్రీకాంత్ కంటేకర్ ఓ మంచి కవిత రాశారు.

జీవితం పూలపాన్పూ కాదు. జీవితమనే సముద్రాన్ని ఈదడానికి నిరంతరం సమరం సాగించాల్సిందే. అయితే, జీవితంలో అనుకోని ఆటంకాలు, కష్టాలు ఎదురవుతూ ఉంటాయి. అందుకు సంబంధించిన ఎరుకను శ్రీకాంత్ కంటేకర్ తన కవిత ద్వారా కలిగిస్తుననాడు. ఒంటరి సముద్రంలా, ఒంటరి ఆకాశంలా, ఒంటరి వర్ష రుతువులా జీవితం సాగతూ ఉంటుందని కవి చెబుతూ జీవనయానంలో ఎదురయ్యే ఆటంకాలను, కష్టాలను చెబుతాడు.

ప్రతి వ్యక్తీ ఏదో తీరం చేరాలనే ప్రయాణం సాగిస్తుంటాడు. కానీ తీరాలు ఏవీ ఉండవనే విషయం మనిషికి తెలియదని శ్రీకాంత్ అంటాడు. జీవితాన్ని కొనసాగించడమనేది మాత్రమే పరమార్థమని, గమ్యం అంటూ ఏదీ ఉండదనే జీవన తాత్వికతను ఆయన తన కవితలో చెప్పాడు. ఈ జీవన యానం కూడా సాఫీగా ఏమీ సాగదు. వెన్నెల ఖడ్గాలు, వెన్నెల ఇంకిపోయిన రాత్రులు జీవితంలో ఎదురవుతాయనే సత్యాన్ని అతను ఆవిష్కరించాడు. ఈ కవిత మొత్తం చదివితే గాఢమైన అనుభూతి కలిగి నిట్టూర్పు విడవడం పాఠకుడి వంతవుతుంది. ఆ రకంగా ఈ కవిత ప్రయోజనాన్ని సాధించి, నడవడమే జీవిత సత్యమనే భావన నిండుతుంది.

- కాసుల ప్రతాపరెడ్డి

Kavisangamam poet: Srikanth Kantekar

ఒంటరి సముద్రం లెక్క

ఎన్ని పడవలెక్కుతావో

ఒంటరి ఆకాశంలా

ఎన్నిసార్లు రాలిపడతావో

ఒంటరి వర్షపు ఋతువులా

ఎందరి కనుపాపలనుంచి జారిపోతావో

నీకు తెలియదు

తీరాలంటూ ఏవీ ఉండవని

నీకు తెలియదు

రెక్కలు లేని విహంగాలు

నలుదిక్కులా ఉంటాయని

నీకు తెలియదు

నులివెచ్చని బాహువులను

నరికే వెన్నెల ఖడ్గలుంటాయని

అరణ్యాలను దహించే

స్వాతిచినుకులు కురుస్తాయని

కన్నీరై ఇంకిపోని కాగితాల చప్పుడు కోసం

వెన్నెల ఇంకిపోయిన రాత్రులు వేచిచూస్తాయని..

- శ్రీకాంత్ కాంటేకర్

English summary
A kavisangamam poet Srikanth Kantekar, in untitled poem expressed the essence of human life.
న్యూస్ అప్ డేట్స్ వెంటనే పొందండి
Enable
x
Notification Settings X
Time Settings
Done
Clear Notification X
Do you want to clear all the notifications from your inbox?
Settings X