రోజా బేరాలు

రోజా కాంగ్రెసులో చేరేందుకు గొప్ప వరాలే పొందినట్లు సమాచారం. ఇందుకు సంబంధించి ఆమె బేరసారాలు సాగించి తగిన హామీని పొందినట్లు సమాచారం. ఆమె కాంగ్రెసులో చేరడం దాదాపుగా ఖరారైంది. ముఖ్యమంత్రి డాక్టర్ వైయస్ రాజశేఖర రెడ్డి సోమవారం చెప్పిన మాటలు ఆ విషయాన్ని ధృవీకరిస్తున్నాయి. రోజా కాంగ్రెసులో చేరుతారని తాను ఆనాడే చెప్పినట్లు ఆయన గుర్తు చేశారు. రాష్ట్ర మహిళా కాంగ్రెస్‌ అధ్యక్ష పదవి రోజాకు అప్పగించే అవకాశాలున్నట్లు పార్టీలో ప్రచారం జరుగుతోంది. మహిళా కాంగ్రెస్ పదవితో పాటు ఎమ్మెల్సీ పదవి గానీ ఏదైనా సంస్థ ఛైర్మన్‌ పదవి గానీ రోజాకు దక్కే అవకాశాలున్నట్లు తెలుస్తోంది. అంతేకాకుండా ఆమెను రాజ్యసభకు పంపే అవకాశాలు కూడా లేకపోలేదని అంటున్నారు. ముఖ్యమంత్రితో ఆదివారం జరిగిన భేటీలో ఆమె స్పష్టమైన హామీ పొందారు. రోజాను కాంగ్రెస్‌లో రప్పించడంలో చిత్తూరు జిల్లాకు చెందిన టీటీడి మాజీ ఛైర్మన్‌, ప్రస్తుత పీసీసీ ప్రధాన కార్యదర్శి బి.కరుణాకర్‌రెడ్డి కీలక పాత్ర వహించారు.ఆదివారం సాయంత్రం రోజా సిఎం క్యాంపు కార్యాలయానికి వచ్చినప్పుడు కూడా కరుణాకర్‌రెడ్డి, రోజా సోదరుడుఆమె వెంట ఉన్నారు.

కరుణాకర్ రెడ్డికి, రోజా సోదరుడికి మధ్య మంచి సంబంధాలున్నాయి. రోజా సోదరుడు కూడా గత కొంత కాలంగా కాంగ్రెస్‌ లో చేరాలంటూ రోజా పై ఒత్తిడి తీసుకొస్తున్నట్లు తెలుస్తోంది. సెప్టెంబర్ 2వ తేదీన ముఖ్యమంత్రి చిత్తూరు పర్యటనకు వెళ్తున్నారు. ఈ సందర్బంగా రోజా కాంగ్రెసులో చేరే అవకాశం ఉంది. రోజా తెలుగుదేశంలో బలమైన నాయకురాలిగా ఎదిగారు. రాష్ట్రవ్యాప్తంగా ఆమెకు తగిన గుర్తింపు, క్యాడర్ ఉంది. తెలుగుదేశం పార్టీ అనుబంధ మహిళా సంఘం తెలుగు మహిళ అధ్యక్షురాలిగా ఆమె పలు ఆందోళనలు చేపట్టారు. పదునైన వాగ్ధాటితో ఆకట్టుకునే గుణం ఆమెకు కలిసి వచ్చిన అంశం. అందుకే రాజశేఖర రెడ్డి పట్టుబట్టి ఆమెను కాంగ్రెసులోకి తీసుకు వస్తున్నట్లు ప్రచారం జరుగుతోంది.

తాను కాంగ్రెసులో చేరబోనని, తాను కాంగ్రెసులోకి వెళ్లడానికి రాయబారాలు నడుపుతున్నట్లు ముఖ్యమంత్రి ఎందుకు చెప్పారో తనకు అర్థం కావడం లేదని రోజా గతంలో అన్నారు. తను తగిన హామీలు పొందడానికే ఈ వ్యూహాన్ని ఆమె ఎంచుకున్నట్లు భావిస్తున్నారు. తనకు తగిన హామీలు రావడంతో ఆమె కాంగ్రెసులో చేరడానికి సిద్ధమైనట్లు చెబుతున్నారు.