By : Oneindia Telugu Video Team
Published : April 02, 2018, 06:07

మాల్యా తో బాబు రూ.150కోట్ల విరాళాలు సేకరించలేదా?

వైయస్సార్ కాంగ్రెస్ పార్టీ ఎంపీలు విజయసాయి రెడ్డి, వైవీ సుబ్బారెడ్డిలు ఏపీ సీఎం చంద్రబాబు నాయుడుపై తీవ్రస్థాయిలో విమర్శలు చేశారు. అవిశ్వాసంపై టీడీపీకి చిత్తశుద్ధి లేదని వ్యాఖ్యానించారు. అవిశ్వాసంపై చర్చ జరగకుండా టీడీపీనే అడ్డుకుంటోందని ఆరోపించారు. లిక్కర్ కింగ్, బ్యాంకులకు 9వేల కోట్ల రూపాయలు ఎగ్గొట్టి విదేశాలకు పారిపోయిన విజయ్ మాల్యా వద్ద డబ్బులు తీసుకున్నారంటూ చంద్రబాబుపై విజయసాయి సంచలన ఆరోపణలు చేశారు.
ఎంపీ విజయసాయి రెడ్డి మాట్లాడుతూ..ఏపీ ప్రయోజనాల కోసం చంద్రబాబు ఢిల్లీకి రావడం లేదని విజయసారెడ్డి ఆరోపించారు. నాలుగేళ్ల దుర్మార్గపు పాలన, ఓటుకు నోటు, పోలవరం అవినీతి, వంటి విషయాలు బయటపడకుండా ఉండేందుకే బాబు ఢిల్లీ పర్యటన అని అన్నారు. తాను ప్రధాని మోడీని కలిస్తే తప్పుపట్టిన టీడీపీ ఎంపీ సుజనా చౌదరి.. ఆయనను జైట్లీని ఎందుకు కలిశారని అడిగితే మాత్రం అది వేరే అంటున్నారని విజయసాయి రెడ్డి చెప్పారు.
విజయ్ మాల్యా 2016లో రాజ్యసభలో ఉన్నారని, అదే సంవత్సరం మార్చిలో లండన్ పారిపోయారని తెలిపారు.2016, మార్చి 12, 13, 16 తేదీల్లో చంద్రబాబు నాయుడు.. విజయ్ మాల్యాను లండన్‌లో కలిశారా? లేదా అని విజయసాయి ప్రశ్నించారు.
రూ. 9వేల కోట్లు మోసం చేసిన మాల్యా నుంచి రూ.150కోట్ల విరాళాలు సేకరించలేదా? అని నిలదీశారు. ఈ ప్రశ్నలకు జవాబు చెప్పకుంటే తన ఆరోపణలు నిజమేనని భావించాల్సి ఉంటుందని అన్నారు. తాను రాజ్యసభలో సీఎం చంద్రబాబుపై ప్రివిలేజ్ మోషన్ నోటీసులు ఇచ్చినట్లు తెలిపారు.
మరో ఎంపీ వైవీ సుబ్బారెడ్డి మాట్లాడుతూ...మంగళవారం అవిశ్వాస తీర్మానం చర్చకు వస్తుందని తాము భావిస్తున్నామని చెప్పారు. చంద్రబాబు ఢిల్లీ వస్తున్నారని తెలిసిందని.. వచ్చి ఏం చేస్తారో చూద్దామని అన్నారు. ప్రధానిపై ఒత్తిడి తెస్తారో.. పార్టీల మద్దతు కూడకడతారో.. యూటర్న్ తీసుకుంటారో చూద్దామని అన్నారు. తనపై కేసులు పెడుతుందనే ఎన్డీఏ ప్రభుత్వానికి చెక్ పెట్టడానికి చంద్రబాబు ఢిల్లీ వస్తున్నారని అన్నారు. పార్లమెంటు సమావేశాల చివరి రోజున తాము రాజీనామాలు చేసి దీక్ష చేపడతామని వైవీ సుబ్బారెడ్డి చెప్పారు.

Oneindia బ్రేకింగ్ న్యూస్
రోజంతా తాజా వార్తలను పొందండి

మా అక్షరం మీ వీక్షణం తెలుగు వారి వన్ ఇండియా