By : Oneindia Telugu Video Team
Published : May 15, 2018, 09:42

IPL 2018: KXIP vs RCB మ్యాచ్ ప్రివ్యూ

ఐపీఎల్ లీగ్ మ్యాచ్‌లు చివరి దశకు వచ్చాయి. నేడు బెంగళూరు రాయల్ ఛాలెంజర్స్‌తో కింగ్స్ ఎలెవన్ పంజాబ్ తలపడబోతోంది. ప్లేఆఫ్స్ రేసులో ఉన్న పంజాబ్‌కు ఈ మ్యాచ్ చాలా కీలకమనే చెప్పాలి. ఇప్పటికే 11 మ్యాచ్‌లు ఆడిన పంజాబ్.. ఆరింటిలో గెలిచి 12 పాయింట్లతో మూడో స్థానంలో ఉంది. ఈ మ్యాచ్‌లో పంజాబ్ గెలిస్తే.. ఇంకొక్క విజయంతో సగౌరవంగా ప్లేఆఫ్స్‌కు వెళ్లిపోవచ్చు. ఒకవేళ ఈ మ్యాచ్‌లో గనుక పంజాబ్ ఓడితే.. మిగిలిన రెండు మ్యాచుల్లోనూ కచ్చితంగా గెలవాల్సి ఉంటుంది. మరోవైపు రాజస్థాన్, కోల్‌కతా కూడా ప్లేఆఫ్స్ బెర్తుల కోసం పోటీపడుతుండటంతో పంజాబ్‌కు మిగిలిన మూడు మ్యాచ్‌లు కీలకమనే చెప్పాలి.
ఇక రాయల్ ఛాలెంజర్స్ బెంగళూరు విషయానికి వస్తే.. ఈ మ్యాచ్‌లో గెలిచినా, ఓడినా ఆ జట్టుకు ఎలాంటి ఉపయోగం లేదు. ఇప్పటికే ప్లేఆఫ్స్ రేసు నుంచి తప్పుకున్న ఆ జట్టు కనీసం విజయాల సంఖ్య అయినా పెంచుకోవాలని చూస్తోంది. అందుకే ఎలాగైనా గెలవాలనే కసితో ఉంది. కానీ ఈ జట్టుపై ఎలాంటి ఒత్తిడిలేదు. ఒత్తిడంతా పంజాబ్‌పైనే. ఎందుకంటే ఈ మ్యాచ్‌లో ఓడితే ఆ జట్టుపై ఒత్తిడి మరింత పెరిగిపోతుంది. కాబట్టి ఎలాగైనా ఈ మ్యాచ్‌లో గెలవాలనే ఒత్తిడి ఆ జట్టు సభ్యులపై కచ్చితంగా ఉంటుంది.
ఈరోజు మ్యాచ్ ఇండోర్‌లో జరగుతుంది. అంటే పంజాబ్ సొంత గడ్డపై అన్నమాట. దీన్ని పంజాబ్ తమకు అనుకూలంగా మలుచుకోవాలని చూస్తోంది. తమకు భారీ మద్దతు ఉండే మైదానంలో చెలరేగిపోవాలని అశ్విన్ సేన ఉవ్విళ్లూరుతోంది. అయితే పంజాబ్‌కు ఓపెనింగ్ కాస్త ఇబ్బందిగా మారింది. ఒక ఓపెనర్ కేఎల్ రాహుల్ అద్భుతంగా రాణిస్తున్నప్పటికీ.. మరో ఓపెనర్ క్రిస్ గేల్ నిలకడగా ఆడటంలేదు. ఒకవేళ ఈ మ్యాచ్‌లో గేల్ రెచ్చిపోతే గనుక బెంగళూరుకు కష్టమనే చెప్పాలి. గేల్‌తో పాటు కరణ్ నాయర్, మయాంక్ అగర్వాల్ ఫామ్‌లోకి రావడం జట్టుకు ఎంతో అవసరం. ఇదిలా ఉంటే, గత మ్యాచ్‌లో గాయపడిన స్పిన్నర్ ముజీబ్ ఈ మ్యాచ్‌లో ఆడతాడా లేదా ఇంకా ఖరారు కాలేదు.

Oneindia బ్రేకింగ్ న్యూస్
రోజంతా తాజా వార్తలను పొందండి

మా అక్షరం మీ వీక్షణం తెలుగు వారి వన్ ఇండియా