By : Oneindia Telugu Video Team
Published : March 29, 2018, 01:13

ఫ్రంట్‌పై కేసీఆర్‌కు మమతా బెనర్జీ షాక్

జాతీయ స్థాయిలో థర్డ్ ఫ్రంట్ ఏర్పాటు విషయంలో తృణమూల్ కాంగ్రెసు పార్టీ అధినేత, పశ్చిమ బెంగాల్ ముఖ్యమంత్రి మమతా బెనర్జీ తెలంగాణ ముఖ్యమంత్రి కె చంద్రశేఖర రావుకు షాక్ ఇచ్చేట్లే కనిపిస్తున్నారు. బిజెపి, కాంగ్రెసులకు వ్యతిరేకంగా జాతీయ స్థాయిలో పీపుల్స్ ఫ్రంట్‌ను ఏర్పాటు చేస్తానని కేసీఆర్ చెబుతుండగా మమతా బెనర్జీ మాట మరో విధంగా ఉంది. ఢిల్లీలో ఆమె వివిధ పార్టీల నాయకులను కలుస్తూ ఫ్రంట్‌పై చర్చలు చేస్తున్న విషయం తెలిసిందే.
వచ్చే ఎన్నికల్లో బిజెపిని ముఖాముఖి ఎదుర్కోవడానికి ప్రాంతీయ పార్టీలకు సహకారం అందించాలని మమతా బెనర్జీ యూపిఎ చైర్ పర్సన్ సోనియా గాంధీని కోరారు. రాష్ట్రాల స్థాయిలో ముఖాముఖి పోటీకి సహకరించాలని ఆమె అడిగారు.
బిజెపిని ఎదుర్కోవడానికి ఏ ఫెడరల్ ఫ్రంట్ ఏర్పాటుకు మమతా బెనర్జీ సుముఖత వ్యక్తం చేశారు. అయితే, కాంగ్రెసు నేతృత్వంలోని ఫ్రంట్‌లో భాగస్వామి కావడానికి మాత్రం ఆమె ఇష్టపడడం లేదు. ప్రాంతీయ పార్టీలతో ఏర్పడే ఫ్రంట్‌కు కాంగ్రెసు సాయం పొందాలనేదే ఆమె అభిమతంగా కనిపిస్తోంది. అయితే, అది కాంగ్రెసుకు వ్యతిరేకమైన ఫ్రంట్ ఏర్పాటు చేయాలనే వైఖరి మాత్రం కాదు.
వివిధ పార్టీల నేతలను కలిసిన మమతా బెనర్జీ మంగళవారంనాడు- సోనియా గాంధీ కార్యాలయంలో ఉన్నారా, లేదా తెలుసుకోవాలని ఓ రాయబారిని పంపించారు. అయితే, సోనియా అప్పటికే వెళ్లిపోయారని సమాచారం వచ్చింది. బుధవారం సాయంత్రం కలుద్దామని సోనియా మమతా బెనర్జీ సందేశం పంపించారు. బుధవారంనాడు వారిరువురి మధ్య గంటపాటు సమావేశం జరిగింది. తాను ఎప్పుడు ఢిల్లీకి వచ్చినా సోనియాను కలుస్తానని, తమ మధ్య సంబంధాలు బాగున్నాయని, సోనియా ఆరోగ్యం గురించి అడిగి తెలుసుకున్నానని మమతా బెనర్జీ చెప్పారు.

Oneindia బ్రేకింగ్ న్యూస్
రోజంతా తాజా వార్తలను పొందండి

మా అక్షరం మీ వీక్షణం తెలుగు వారి వన్ ఇండియా