నిత్యం ప్రజా సమస్యలు, రాజకీయ సమీక్షలు, అధికారిక పర్యటనలతో క్షణం తీరిక లేకుండా గడిపే తెలంగాణ ముఖ్యమంత్రి రేవంత్ రెడ్డి ఒక్కసారిగా 'సాధారణ తాత'గా మారిపోయారు. చాలా బిజీగా ఉండే ముఖ్యమంత్రి హోదాను పక్కనబెట్టి, కన్నకూతురి కొడుకైన తన ముద్దుల మనవడి కోసం వంటగదిలోకి అడుగుపెట్టారు. "తాత.. నువ్వు పూరీలు వేస్తేనే తింటా" అంటూ మనవడు అడిగిన ముద్దు ముద్దు మాటలకు సీఎం రేవంత్ రెడ్డి మురిసిపోయారు. మనవడి కోరికను కాదనలేక స్వయంగా ఆయనే కిచెన్లో పిండి కలిపి పూరీలు ఒత్తుతూ, వాటిని నూనెలో వేస్తూ సరదాగా గడిపారు. దీనికి సంబంధించిన వీడియోను ముఖ్యమంత్రి స్వయంగా సోషల్ మీడియా వేదికగా పంచుకోగా, అది కాస్తా క్షణాల్లో వైరల్గా మారింది.
రాజకీయాల్లో ఎంతటి బిజీ జీవితం ఉన్నప్పటికీ, కుటుంబంతో గడిపే ఇలాంటి చిన్న చిన్న క్షణాలే జీవితాంతం గుర్తిండిపోయే మధుర జ్ఞాపకాలని ముఖ్యమంత్రి ఈ సందర్భంగా భావోద్వేగానికి గురయ్యారు. తన మనవడితో గడిపిన ఆ అపురూప క్షణాల గురించి రేవంత్ రెడ్డి ఎక్స్ (ట్విట్టర్) వేదికగా స్పందిస్తూ.. "తాత.. నువ్వు పూరీలు వేస్తేనే తింటా అని మనవడు అడిగితే తప్పుతుందా? పక్కన మనవడు, చేతిలో పిడికెడు పిండి, దోసిట్లో నవ్వులు, గుండ్రంగా లేని డజన్ పూరీలు... బిజీ బిజీగా సాగుతున్న ప్రజా జీవితంలో.. మనవడితో కలిసి పూరీలు వేస్తూ గడిపిన ఈ కొన్ని క్షణాలు, మధుర జ్ఞాపకాలు" అంటూ చాలా అందంగా, మనసుకు హత్తుకునేలా రాసుకొచ్చారు. ముఖ్యమంత్రి పంచుకున్న వీడియోలో.. మనవడి పక్కనే నిలబడి ఆసక్తిగా చూస్తుండగా, రేవంత్ రెడ్డి ఎంతో ఓపిగ్గా పూరీలు వేస్తూ కనిపించారు. పూరీలు పర్ఫెక్ట్గా గుండ్రటి ఆకారంలో రాకపోయినా, ఆ తాత-మనవళ్ల మధ్య వ్యక్తమైన అమాయకపు నవ్వులు, అపారమైన అనురాగం మాత్రం చూసే ప్రతి ఒక్కరి హృదయాలను గెలుచుకున్నాయి. సాధారణంగా రేవంత్ రెడ్డి అంటే ఎప్పుడూ పదునైన విమర్శలు, దూకుడు రాజకీయాలతో వార్తల్లో నిలుస్తుంటారు. కానీ, ఆయనలోని ఈ సరికొత్త ఫ్యామిలీ మ్యాన్ యాంగిల్, సున్నితమైన మనస్తత్వాన్ని చూసి నెటిజన్లు, అభిమానులు హర్షం వ్యక్తం చేస్తున్నారు. "రాజకీయ నాయకుడైనా.. కన్నమనవడి ముందు తలవంచాల్సిందే" అంటూ ఈ వీడియోపై సామాన్యుల నుంచి సెలబ్రిటీల వరకు ప్రశంసలు కురిపిస్తున్నారు.దోసిట్లో నవ్వులు.. గుండ్రంగా లేని డజన్ పూరీలు!
పాలనా ఒత్తిడి వీడి.. మనవడి మురిపాల్లో..!