ట్యాంక్ బండ్ విగ్రహాల రగడ

By కె. నిశాంత్

Updated: Monday, July 16, 2012, 15:42 [IST]

హైదరాబాద్ ట్యాంక్ బండ్ పై ప్రతిష్టించిన తెలుగు వెలుగులు పంచిన మహాత్ముల విగ్రహాలు వివాదంలో చిక్కుకున్నాయి. తెలంగాణ రాష్ట్ర ఏర్పాటు నేపథ్యంలో విగ్రహాలు కూడా వివాదానికి దారి తీశాయి. ట్యాంక్ బండ్ పై ఎక్కువగా సీమాంధ్రుల విగ్రహాలే ఉన్నాయనేది తెలంగాణవాదులు చాలా కాలంగా వాదిస్తూ వస్తున్నారు. అది పతాక స్థాయికి చేరుకుని విగ్రహాలను కూలుస్తామని తెలంగాణ రాష్ట్ర సమితి (తెరాస) శాసనసభ్యుడు కెటి రామారావు హెచ్చరించే స్థాయికి చేరుకుంది. విగ్రహాలను కూల్చడమనేది సమంజసమైందేనా అని ఆలోచించడానికి ముందు ఆ వాదన ఎందుకు వచ్చిందనేది ఆలోచించాల్సిన అవసరం ఉంది. తెలంగాణ ప్రాంత ప్రత్యేకతను చాటుకుంటూ, అందుకు అడ్డం వస్తున్న భావనలను, విగ్రహాలను తప్పు పట్టాల్సిన అవసరం తెలంగాణవాదులకు ఏర్పడింది. అందులో భాగంగానే తెలంగాణవాదులు ఇప్పటికే తెలుగుతల్లి భావనను ధ్వంసం చేసి, ప్రత్యేకంగా తెలంగాణ తల్లిని ప్రతిష్టించుకున్నారు. ఇప్పుడు మిగతా విగ్రహాలపై పడ్డారని అనుకోవాలి.

నిజాంపై పోరాటం చేసి ప్రాణత్యాగం చేసిన గోండు నాయకుడు కొమురం భీము విగ్రహాన్ని ప్రతిష్టంచకుండా సీమాంధ్రులకు సంబంధించిన విగ్రహాలనే ఎక్కువగా ప్రతిష్టించారనే ఆరోపణ వినిపిస్తోంది. ట్యాంక్ బండ్ పై ఎక్కువగా సీమాంధ్రుల విగ్రహాలు ఉన్న మాట వాస్తవమే. సమాజానికి చేసిన సేవలో అది గుర్తింపునకు సంబంధించింది. అలాంటి సేవను పరిగణనలోకి తీసుకోవాల్సి వస్తే తెలంగాణలో అంతకన్నా ఎక్కువ త్యాగాలు, సేవలు చేసినవారున్నారు. కొమురం భీము, అల్లూరి సీతారామారాజు చేసిన పోరాటాలు ఒకే విధమైనవి. పోరాట తీరులోనూ, త్యాగంలోనూ ఒకరికొకరు తీసిపోరు. అటువంటప్పుడు అల్లూరి సీతారామారాజు విగ్రహం ట్యాంక్ బండ్ పై ఉండి, కొమురం భీము విగ్రహం లేకపోవడమేమిటనే ప్రశ్న రావడం అత్యంత సహజమైన విషయం.

అలాగే, అత్యంత వివాదంగా మారిన మరో విగ్రహం మహాకవి శ్రీశ్రీది. ఆయన తెలంగాణ గురించి ఏమీ రాయలేదనేది తెలంగాణవాదుల ఆరోపణ. తెలంగాణ సాయుధ పోరాటం జరుగుతున్న కాలంలో ఆయన నిజాం సంస్థానంలో పని చేశారు. ఇది కూడా తెలంగాణకు సంబంధించి శ్రీశ్రీకి ఉన్న మచ్చ. అయితే, ఆయన రాసిన దాన్ని చూడాలా, రాయని దాన్ని వాదానికి తీసుకోవాలా అనేది ప్రశ్న. రాసిన దాన్ని బేరీజు వేయడమే న్యాయం. అయితే, తెలంగాణకు ఏమీ చేయలేని ఓ వ్యక్తి విగ్రహాన్ని తెలంగాణకు నడిబొడ్డున ఉన్న హైదరాబాదులో ఎందుకు ప్రతిష్టించాలనే ప్రశ్న ఒక విధంగా న్యాయమైందే. అలాగే, మిగతా మహా పురుషులకు సంబంధించిన కాంట్రిబ్యూషన్ ను కూడా లెక్కలోకి తీసుకోవాల్సి ఉంటుంది. కందుకూరి వీరేశలింగం కృషి అంతా రాజమండ్రి, కోస్తా ప్రాంతాల్లో సాగింది. ఆయన కన్నా ముందు అటువంటి సంఘ సంస్కరణ కార్యక్రమాలు చేపట్టిన మహా పురుషుడు తెలంగాణలో ఉన్నాడని తెలంగాణ చరిత్ర పరిశోధకులు తేల్చారు. ఇలా చెప్పుకుంటూ పోతే తెలంగాణ మహాపురుషులకు జరిగిన అన్యాయం చాలా ఉంది. ఈ నేపథ్యంలో కెటిఆర్ ప్రకటనను చూడాల్సి ఉంటుంది.