చంద్రబాబు మేడారం పర్యటన వివాదం

హైదరాబాద్: తెలుగుదేశం పార్టీ అధ్యక్షుడు నారా చంద్రబాబు నాయుడు మేడారం పర్యటన రద్దయింది. చంద్రబాబు పర్యటనపై వివాదం చెలరేగింది. ఒకే రోజు ముఖ్యమంత్రి డాక్టర్ వైయస్ రాజశేఖర రెడ్డి, చంద్రబాబు పర్యటన ఒకే రోజు ఉండడంతో ఈ వివాదం చెలరేగింది. హెలిపాడు సిద్ధంగా లేదని చెప్పడంతో చంద్రబాబు పర్యటన రద్దయింది. మేడారంలో సమ్మక్క - సారలమ్మ జాతర అత్యంత జనసందోహం మధ్య జరుగుతోంది. హెలికాప్టర్ ద్వారా చంద్రబాబు వస్తే ఏర్పాట్లు చేయలేమని పోలీసు ఉన్నతాధికారులు చెప్పారు. రోడ్డు ద్వారా వస్తే తాము ఏర్పాట్లు చేయగలమని వరంగల్ జిల్లా ఎస్పీ సౌమ్యా మిశ్రా అన్నారు.

రెండు రోజుల క్రితమే చంద్రబాబు పర్యటన ఖరారైందని, చంద్రబాబు మేడారం పర్యటనను అడ్డుకోవడానికి ముఖ్యమంత్రి పేషీ కుట్ర జరుగుతోందని తెలుగుదేశం పార్టీ శాసనసభ్యుడు ఎర్రబెల్లి దయాకర్ రావు అన్నారు. ముఖ్యమంత్రి వచ్చి పోయిన తర్వాత గానీ, ముఖ్యమంత్రి రావడానికి ముందు గానీ చంద్రబాబు పర్యటనకు ఏర్పాట్లు చేయాలని అడిగామని, అందుకు కూడా అధికారులు అంగీకరించడం లేదని ఆయన అన్నారు. చంద్రబాబు మేడారం పర్యటనను అడ్డుకోవడానికి ముఖ్యమంత్రి పేషీ కుట్ర చేస్తుందనే విమర్శ నీచాతినీచమైందని ఆర్థిక మంత్రి కె. రోశయ్య అన్నారు. చంద్రబాబు పర్యటనను అడ్డుకోవాల్సిన అవసరం ప్రభుత్వానికి లేదని ఆయన అన్నారు. రాష్ట్రంలో పర్యటించకుండా ప్రభుత్వం చంద్రబాబును ఎప్పుడైనా అడ్డుకుందా అని ఆయన అడిగారు.