కోటి మంది ఆడబిడ్డలను కోటీశ్వరులను చేయడమే లక్ష్యం - సీఎం రేవంత్
తెలంగాణలో మహిళలు, చిన్నారుల సంక్షేమం, పోషకాహార భద్రత, విద్య, ఆరోగ్య రంగాల అభివృద్ధికి ప్రభుత్వం అత్యంత ప్రాధాన్యత ఇస్తోందని ముఖ్యమంత్రి రేవంత్ రెడ్డి తెలిపారు. తెలంగాణ ఫుడ్స్ ఆధ్వర్యంలో ఏర్పాటు చేసిన బాలామృతం నూతన ఉత్పత్తి ప్లాంట్ ప్రారంభోత్సవ కార్యక్రమంలో పాల్గొన్న ఆయన, రాష్ట్రంలో మహిళా సాధికారతతో పాటు గర్భిణీలు, బాలింతలు, చిన్నారుల ఆరోగ్యాన్ని మెరుగుపరచడం ప్రభుత్వ ప్రధాన లక్ష్యమని స్పష్టం చేశారు. 2034 నాటికి తెలంగాణలో కోటి మంది మహిళలను కోటీశ్వరులను చేయడమే తమ ప్రభుత్వ లక్ష్యమని ఆయన ప్రకటించారు.
మహిళల సంక్షేమానికి పునాది వేసిన నాయకుల్లో మాజీ ప్రధాని ఇందిరా గాంధీ పేరు చిరస్థాయిగా నిలిచిపోతుందని సీఎం గుర్తు చేశారు. గర్భిణీలు, బాలింతల ఆరోగ్య పరిరక్షణ కోసం మహబూబ్నగర్ జిల్లాలో ఇందిరా గాంధీ ప్రారంభించిన పోషకాహార కార్యక్రమమే కాలక్రమేణా విస్తరించి, నేడు బాలామృతం తయారీకి ప్రత్యేక పరిశ్రమగా ఎదిగిందన్నారు. ఆ ప్రయాణంలో మరో ముందడుగుగా ఆధునిక సాంకేతికతతో కొత్త బాలామృతం ప్లాంట్ను ప్రారంభించడం ఆనందంగా ఉందన్నారు.
ఇందిరా గాంధీ, సోనియా గాంధీ, ప్రియాంక గాంధీ నుంచి తెలంగాణ మంత్రి సీతక్క వరకు మహిళలు రాజకీయాల్లో తమ సత్తా చాటారని సీఎం పేర్కొన్నారు. అదే స్ఫూర్తితో తెలంగాణలో మహిళలను అన్ని రంగాల్లో ఆర్థికంగా బలోపేతం చేసే దిశగా ప్రభుత్వం అనేక కార్యక్రమాలు అమలు చేస్తోందన్నారు.
మహిళల ఆర్థిక స్వావలంబన కోసం ఇప్పటికే పలు కీలక నిర్ణయాలు తీసుకున్నామని సీఎం వివరించారు. రాష్ట్రవ్యాప్తంగా మహాలక్ష్మి పథకం ద్వారా రెండు కోట్లకు పైగా మహిళలకు ఆర్టీసీ బస్సుల్లో ఉచిత ప్రయాణ సౌకర్యం కల్పించామని చెప్పారు. అలాగే ఇందిరమ్మ ఇళ్లను మహిళల పేరుతోనే మంజూరు చేస్తున్నామని, 200 యూనిట్ల వరకు ఉచిత విద్యుత్ అందిస్తున్నామని తెలిపారు. మహిళలు కుటుంబానికి మాత్రమే పరిమితం కాకుండా ఆర్థికంగా బలపడేలా ప్రభుత్వం ప్రతి నిర్ణయం తీసుకుంటోందన్నారు.
స్వయం సహాయక సంఘాల మహిళలను పారిశ్రామికవేత్తలుగా తీర్చిదిద్దడంపై ప్రత్యేక దృష్టి పెట్టామని సీఎం చెప్పారు. అందులో భాగంగా వెయ్యి ఆర్టీసీ బస్సులకు మహిళలను యజమానులుగా చేసే కార్యక్రమాన్ని ప్రారంభించామని, అలాగే వెయ్యి మెగావాట్ల సామర్థ్యం గల సోలార్ విద్యుత్ ప్రాజెక్టులను మహిళా సంఘాలకే అప్పగించామని వెల్లడించారు. మహిళలు ఉద్యోగాలు కోరేవారిగా కాకుండా ఉపాధి కల్పించే స్థాయికి ఎదగాలని ప్రభుత్వం కృషి చేస్తోందన్నారు.
2034 నాటికి తెలంగాణలో కోటి మంది మహిళలను కోటీశ్వరులను చేయడమే తమ ప్రభుత్వ లక్ష్యమని సీఎం స్పష్టం చేశారు. మహిళల ఆదాయాన్ని పెంచేలా స్వయం ఉపాధి, పరిశ్రమలు, వ్యవసాయ అనుబంధ రంగాలు, సేవా రంగాల్లో అవకాశాలు కల్పిస్తూ ఆ దిశగా అడుగులు వేస్తున్నామని చెప్పారు.
బాలామృతం కొత్త ప్లాంట్ ప్రారంభం కేవలం ఒక పరిశ్రమ ప్రారంభం మాత్రమే కాదని, గర్భిణీలు, బాలింతలు, చిన్నారులకు నాణ్యమైన పోషకాహారం అందించే ప్రజా ఆరోగ్య కార్యక్రమమని సీఎం వివరించారు. రాష్ట్రంలో పోషకాహార లోపాన్ని తగ్గించి, ఆరోగ్యవంతమైన తెలంగాణను నిర్మించాలనే లక్ష్యంతో ఈ ప్రాజెక్టును చేపట్టామని చెప్పారు.
పిల్లల ఆరోగ్యంతో పాటు విద్యపైనా ప్రభుత్వం ప్రత్యేక శ్రద్ధ చూపుతోందని రేవంత్ రెడ్డి పేర్కొన్నారు. ప్రభుత్వ పాఠశాలల్లో చదివే విద్యార్థులు ఆకలితో తరగతులకు హాజరు కాకూడదనే ఉద్దేశంతో బ్రేక్ఫాస్ట్ పథకాన్ని ప్రారంభించామని తెలిపారు. విద్యార్థులతో పాటు ఉపాధ్యాయులకు కూడా అల్పాహారం, మధ్యాహ్న భోజనం అందించే కార్యక్రమాలను అమలు చేస్తున్నామని చెప్పారు.
ప్రభుత్వ పాఠశాలలను కార్పొరేట్ విద్యాసంస్థలకు దీటుగా తీర్చిదిద్దేందుకు భారీగా నిధులు వెచ్చిస్తున్నామని సీఎం పేర్కొన్నారు. ఆధునిక తరగతి గదులు, డిజిటల్ సౌకర్యాలు, మెరుగైన మౌలిక వసతులు, నాణ్యమైన బోధన ద్వారా ప్రభుత్వ పాఠశాలలపై ప్రజల్లో విశ్వాసాన్ని పెంచుతున్నామని తెలిపారు. విద్యార్థుల ఆరోగ్యం, విద్యపై పెట్టే ప్రతి రూపాయి ఖర్చు కాదని, అది తెలంగాణ భవిష్యత్తుపై పెట్టుబడని అన్నారు.
రాష్ట్రంలోని 3 కోట్ల 28 లక్షల మంది ప్రజలకు నాణ్యమైన సన్నబియ్యం పంపిణీ చేస్తున్నామని, పట్టణ ప్రాంతాల్లో నివసిస్తున్న పేదల కోసం లక్ష ఇండ్ల నిర్మాణాన్ని లక్ష్యంగా పెట్టుకున్నామని సీఎం వెల్లడించారు. సంక్షేమం, అభివృద్ధి రెండింటినీ సమానంగా ముందుకు తీసుకెళ్లడమే తమ ప్రభుత్వ విధానమని చెప్పారు.
తమ ప్రభుత్వం అమలు చేస్తున్న పథకాలు ఓటు బ్యాంకు రాజకీయాల కోసం కాదని, ప్రజల జీవన ప్రమాణాలను మెరుగుపరచడం, విద్యార్థుల భవిష్యత్తును బలోపేతం చేయడం, మహిళలను ఆర్థికంగా స్వావలంబులుగా తీర్చిదిద్దడమే ప్రధాన లక్ష్యమని సీఎం రేవంత్ రెడ్డి స్పష్టం చేశారు.
Click it and Unblock the Notifications
Sign in with Google