అమ్మకం పన్ను తగ్గింపు యోచన: రోశయ్య

హైదరాబాద్: పెట్రో ఉత్పత్తులపై అమ్మకం పన్నును తగ్గించే విషయంపై రేపటి మంత్రి వర్గ సమావేశంలో నిర్ణయం తీసుకుంటామని రాష్ట్ర ఆర్థిక మంత్రి కె. రోశయ్య చెప్పారు. గుంటూరు జిల్లా పర్యటనలో ముఖ్యమంత్రి హైదరాబాద్ తిరిగి వచ్చిన తర్వాత మంత్రివర్గ సమావేశం ఏర్పాటు చేసి పెట్రో ఉత్పత్తులపై అమ్మకం పన్నును తగ్గించే విషయంపై నిర్ణయం తీసుకుంటామని ఆయన చెప్పారు. అమ్మకం పన్నును తగ్గించాలని ప్రధాని డాక్టర్ మన్మోహన్ సింగ్ రాష్ట్రాలకు సూచించారు. ఇదే సూచన కాంగ్రెస్ పాలిత రాష్ట్రాలకు పార్టీ అధ్యక్షురాలు సోనియా గాంధీ చేశారు. ఈ నేపథ్యంలో రాష్ట్రం అమ్మకం పన్ను తగ్గింపుపై ఆలోచన చేస్తోంది.

పెట్రోల్, వంటగ్యాస్ ధరలు పెరగడం ప్రజలపై భారమేనని రోశయ్య అన్నారు. ధరలు పెంచకూడదనేదని ముఖ్యమంత్రి వైయస్ రాజశేఖర రెడ్డి అభిప్రాయమని, అయితే అనివార్యమైన స్థితిలో కేంద్రం ధరలు పెంచిందని ఆయన చెప్పారు. రాష్ట్రంలో పెట్రో ఉత్పత్తులపై ఇతర రాష్ట్రాల్లో కన్నా ఎక్కువగా ఉందని అంటున్నారని, అయితే ఇది దేశమంతటా ఒకే విధంగా ఉండడానికి అవకాశం లేదని, పరిస్థితులను బట్టి ఒక్కో రాష్ట్రంలో ఒక్కో విధంగా ఉందని ఆయన అన్నారు.