పాతబస్తీ ఎంఐఎం సొత్తు కాదు: పవన్ కళ్యాణ్

హైదరాబాద్: హీరో, ప్రజారాజ్యం పార్టీ నాయకుడు పవన్ కళ్యాణ్ బుధవారం ఉదయం హైదరాబాద్ పాత బస్తీలో పర్యటించి, పార్టీ పతాకాలను ఎగురవేశారు. ఈ సందర్భంగా ఆయన మాట్లాడుతూ పాత బస్తీ ఎంఐఎం గుత్తసొత్తు కాదని, ఇక్కడి ప్రజలు మార్పు కోరుకుంటున్నారని వ్యాఖ్యానించారు. నిన్న కూడా పవన్ కళ్యాణ్ హైదరాబాద్ లోని ముఖ్యమైన మాదాపూర్ పరిసర ప్రాంతాల్లో పర్యటించి యువతలో ఉత్సాహం రేకెత్తించిన విషయం తెలిసిందే.

నిన్న గ్రేటర్ హైదరాబాద్ పరిధిలోని పదిహేను అసెంబ్లీ నియోజకవర్గాల్లో పర్యటించిన తర్వాత పార్టీ కార్యాలయంలో ఆయన విలేఖరులతో మాట్లాడారు. తాను పర్యటించిన నియోజకవర్గాల్లో సమస్యలు తెలుసుకుని, వాటిని సంబంధిత అధికారుల దృష్టికి తీసుకువెళ్లి పరిష్కరించేందుకు తమ సిబ్బంది కృషి చేస్తారని తెలిపారు. భవిష్యత్‌లో పార్టీ తరఫున జిల్లాల పర్యటనలు చేస్తానన్నారు.

పర్యటనలో 'చిరు' భద్రత కోసం 500 మంది సిబ్బందిని కేటాయించామన్నారు. తాను పర్యటించిన నియోజకవర్గాల్లో అన్నిచోట్లా జెండావిష్కరణతో పాటు సభ్యత్వ నమోదు కార్యక్రమాన్నీ పరిశీలించానన్నారు. గ్రేటర్‌ హైదరాబాద్‌ పరిధిలోని నాంపల్లి, చాంద్రాయణగుట్ట, యాకుత్‌పురా, చార్మినార్‌, గోషామహల్‌, బహదూర్‌పురా, కార్వాన్‌, రాజేంద్రనగర్‌ నియోజకవర్గాల్లో బుధవారం పవన్‌ కళ్యాణ్‌ పర్యటిస్తారు.