ఉండవల్లి ఆరోపణలను కొట్టేసిన బాబు

హైదరాబాద్: తనపై కాంగ్రెస్ పార్లమెంటు సభ్యుడు ఉండవల్లి అరుణ్ కుమార్ చేసిన ఆరోపణలపై ప్రభుత్వం విచారణ జరిపించుకోవచ్చునని తెలుగుదేశం పార్టీ అధ్యక్షుడు నారా చంద్రబాబునాయుడు అన్నారు. అక్రమ రిజిస్ట్రేషన్లు చేయించుకుంటే ఆ భూములను స్వాధీనం చేసుకోవచ్చునని ఆయన సోమవారం మీడియా ప్రతినిధులతో అన్నారు. తాను భూములను అక్రమంగా రిజిస్ట్రేషన్ చేయించుకుంటే ప్రభుత్వం ఎందుకు చర్యలు తీసుకోలేదని ఆయన ప్రశ్నించారు. ఉండవల్లి అరుణ్ కుమార్ చేసిన ఆరోపణలను ఆయన కొట్టిపారేశారు.

ఈ నెల 5వ తేదీన గుంటూరులో జరిగే యువగర్జన సదస్సు ఏర్పాట్లను ఆయన సమీక్షించారు. వచ్చే ఎన్నికల్లో కాంగ్రెస్ నిమజ్జనం తప్పదని ఆయన అన్నారు. తాము గెలిచి తీరుతామని ఆయన ధీమా వ్యక్తం చేశారు. యువగర్జన సదస్సు ద్వారా ప్రభుత్వ అవినీతిపై యువత యుద్ధం ప్రారంభిస్తుందని ఆయన అన్నారు. 230 సీట్లు గెలుచుకుంటామని చెబుతున్న కాంగ్రెసుకు వచ్చే ఎన్నికల్లో 23, 30 సీట్లకు మధ్యనే వస్తాయని ఆయన అన్నారు. ప్రభుత్వం అవినీతిపై ఎన్నికల్లో ఓడిపోయిన తర్వాతనైనా ప్రస్తుత ముఖ్యమంత్రి డాక్టర్ వైయస్ రాజశేఖర రెడ్డి జవాబు చెప్పక తప్పదని ఆయన అన్నారు.