మనస్పర్థలు తొలగిస్తాం: నాగబాబు

విశాఖపట్నం: తమ పార్టీలో గ్రూప్ తగాదాలు లేవని ప్రజారాజ్యం పార్టీ (పిఆర్పీ) నాయకుడు, సినీ నటుడు నాగబాబు చెప్పారు. అభిప్రాయభేదాలు మాత్రమే ఉన్నాయని, వాటిని తొలగిస్తామని ఆయన సోమవారం మీడియా ప్రతినిధులతో అన్నారు. వచ్చే ఎన్నికల్లో తమ పార్టీ గెలుస్తుందనే ఉద్దేశంతో ఉన్న పార్టీ నాయకులు టికెట్ల కోసం పోటీ పడుతున్నారని, అవి గ్రూప్ తగాదాలు కావని ఆయన అన్నారు. పార్టీని బలోపేతం చేసిన తర్వాతనే వచ్చే ఎన్నికల్లో పొత్తులపై ఆలోచిస్తామని ఆయన చెప్పారు.

వచ్చే ఎన్నికల్లో తమ పార్టీ గెలిచి తీరుతుందని ఆయన ధీమా వ్యక్తం చేశారు. కాంగ్రెసుతోనే తమకు పోటీ ఉంటుందని ఆయన అభిప్రాయపడ్డారు. సామాజిక న్యాయమే తన ప్రధాన ఎజెండా అని ఆయన చెప్పారు. గ్రామస్వరాజ్యం, అవినీతి రహిత సమాజ స్థాపన తమ పార్టీ లక్ష్యాలని ఆయన చెప్పారు. తమ నేత చిరంజీవి ప్రజా అంకిత యాత్ర సందర్భంగా ప్రజలనుంచి వచ్చే స్పందనను బట్టి తమ ఎజెండాను మరింత విస్తృతంగా రూపొందించుకుంటామని ఆయన చెప్పారు.