ఎన్నికలకు ముందే థర్డ్ ఫ్రంట్: బాబు

చెన్నై‌: వచ్చే ఎన్నికలకు ముందే జాతీయ స్థాయిలో తృతీయ కూటమి ఏర్పడుతుందని తెలుగుదేశం పార్టీ అధ్యక్షుడు, యుఎన్ పిఎ నేత నారా చంద్రబాబు నాయుడు చెప్పారు. ప్రధాని అభ్యర్థిగా బహుజన సమాజ్ పార్టీ (బిఎస్పీ) నేత మాయావతిని అంగీకరించే విషయంపై తాము ఇది వరకే తమ వైఖరిని వెల్లడించామని ఆయన ఒక ప్రశ్నకు సమాధానంగా చెప్పారు. ఒక ప్రైవేట్ కార్యక్రమంలో పాల్గొనడానికి మంగళవారం ఉదయం చెన్నైకి వచ్చిన చంద్రబాబు మీడియా ప్రతినిధులతో మాట్లాడారు.

జాతీయ స్థాయిలో యుఎన్ పిఎ, వామపక్షాలు, బిఎస్పీలతో కలిపి కాంగ్రెస్, బిజెపిలకు వ్యతిరేకంగా తృతీయ ప్రత్యామ్నాయాన్ని ఏర్పాటు చేయాలనే ప్రయత్నాలు జరుగుతున్న విషయం తెలిసిందే. ప్రధాని డాక్టర్ మన్మోహన్ సింగ్ నేతృత్వంలోని యుపిఎ ప్రభుత్వ బలపరీక్ష సమయంలో ఈ ప్రయత్నాలు ముమ్మరంగా సాగాయి. వచ్చే ఎన్నికల్లో పొత్తులు కూడా ఈ కూటమి ఏర్పాటుకు అనుకూలంగానే ఉండాలని సిపిఎం భావిస్తోంది. ఇందులో భాగంగా సిపిఎం ఆంధ్రప్రదేశ్ లో ఆ పార్టీ తెలుగుదేశం పార్టీతో పొత్తు పెట్టుకోవాలని నిర్ణయం తీసుకుంది.