పెట్రో,డీజిల్ ధరలు తగ్గవు: ప్రధాని

ప్రధాని ప్రత్యేక విమానం నుంచి: పెట్రోల్, డీజిల్ ధరలు తగ్గించే ప్రసక్తి లేదని ప్రధాని డాక్టర్ మన్మోహన్ సింగ్ స్పష్టం చేశారు. ఇంధన అమ్మకాలపై చమురు కంపెనీలు నష్టాల బారిన పడడం ఆగే వరకు పెట్రోల్, డీజిల్ ధరలు తగ్గించబోమని ఆయన అన్నారు. ప్రభుత్వం ఇచ్చే సబ్సిడీలకు ఒక పరిమితి ఉంటుందని ఆయన అన్నారు.

పెట్రోల్, డీజిల్ ధరలు తగ్గిస్తే చమురు కంపెనీలు తట్టుకోగలిగే పరిస్థితి ఉంటేనే ధరల తగ్గింపుపై ఆలోచన చేస్తామని ఆయన సోమవారం రాత్రి భారత్ కు తిరిగి వస్తూ విమానంలో విలేకరులతో చెప్పారు. పెట్రోల్ అమ్మకాలపై చమురు కంపెనీలకు లాభం వస్తోందని, అయితే డీజిల్ అమ్మకాలపై ఇంకా నష్టాలు వస్తూనే ఉన్నాయని ఆయన చెప్పారు. ప్రభుత్వ రంగ సంస్థలు ఇండియన్ ఆయిల్, భారత్ పెట్రోలియం, హిందూస్థాన్ పెట్రోలియం పెట్రోల్ పై లీటరుకు రు.4.12 పైసల లాభాన్ని ఆర్జిస్తున్నాయని, డీజిల్ పై లీటరుకు 96 పైసల నష్టం వస్తోందని ఆయన చెప్పారు. ఈ ఆర్థిక సంవత్సరంలో ఎల్పీజిపై 128 కోట్లు రూపాయలు, కిరోసిన్ పై 135 కోట్ల రూపాయలు నష్టం వస్తుందని ఒక అంచనా.